我現年三十尾，好快見四字頭，可能係其他人眼中，我生活得好好：同太太係識於微時，有個快將升小學既小朋友，工作上收入唔錯，有自己物業，外人睇會覺得我係一個生活穩定既中產。但其實好多野，真係自己知自己事。

正因為同太太識得太耐，由朋友變女朋友，再由女朋友變老婆，中間過程冇乜火花激情，一切都來得平平淡淡，特別係近呢幾年，情況更加凸顯。因為我工作要深夜先收得工，佢就朝九晚五，有時我收工，佢已訓覺，我訓醒，就一屋空盪盪，住埋同一間屋，實際上聚少離多。

而且有左小朋友之後，佢既生活重心，基本上都放曬係小朋友身上，放工後就同個仔係外家同公公婆婆食晚飯，放假既節目亦全部圍繞住個仔，有時難得同老婆傾得上幾句計，佢同我講起個仔既事，做左咩野百厭野、今日學左乜野生字、睇左咩野書，在我聽起來，好似聽緊另一個唔相關既家庭既日常生活，但明明呢個係我既家庭，卻又毫無交集，感覺，好古怪，好唔舒服。

本來，男人除左家庭，可以將重心放係事業，但我事業亦開始見頂，雖然工作表現好好，但殘酷既現實係，除非我對上有人走，否則未來幾年都應該升職無望，而我呢組人事一向相對穩定，即係基本上唔駛諗有得再升。而且就算意外地有得升職，可能加你雞碎咁多人工，但工作量比之前多好多，要管多好多野，煩多好多野，咁又係唔係好事？我真係唔知。

結果而家既生活，每日搭同一班車返工，同一班車放工，咁多年來不知已搭了幾多千次；食來食去，都係公司附近茶記，每天分別只是A餐或B餐，意粉定跟飯；放假既節目就係接送小朋友去興趣班，又或者去屋企附近既某幾間餐廳，揀一間，食餐叫做豐富一點的，但叫來叫去其實都是某幾樣送。每一日、每一個星期、每一個月、每一季、每一年，只是不斷重重複複地過，婚姻關係也好，家庭生活也好，事業也好，都像在同一個點原地踏步。

希望生活有火花，有精彩，是我要求太過份了嗎？還是在今時今日的香港地，我應該感恩，有個不會亂FING錢的老婆、一個尚算聽話的小朋友、一份收入不錯的工作、一間爭少少就供斷的樓，我已比很多人過得好，不應該再「貪心」了……

轉載請註明來源：今天頭條