「其實你幾時開始鍾意我架？我真系好想知呀。」Mary水汪汪眼咁話。

「好早之前，早過你。」阿強諗都唔諗就答。

「你又知？咁即系幾時啫？我想知呀！」Mary再問。

「咪第一次見果時咯！一見鍾情！」阿強話，佢自己雖然知道咁講比較誇張，但佢知道Mary一定會鍾意呢個答案。

「痴線，邊有咁誇張呀哈哈哈！」Mary開心咁笑住。呢啲咪就系口裡說不，身體很誠實咯。

「咁你呢？你又系幾時開始鍾意我架？」阿強好奇咁問。

「嘻嘻，唔話你知！」Mary鬼馬咁講。無辦法，一向女人都可以選擇唔答男人嘅問題，但男人就一定要答、答曬、答啱女人嘅問題，就系咁唔公平～

老老實實，其實呢個問題就好似「其實你鍾意我啲咩？」一樣咁無聊。

首先，邊個鐘意邊個先根本一啲都唔重要，因為呢個唔系比賽，唔需要贏在起跑線上，而且先後次序同愛嘅深淺度完全無關。我可以比你遲一個月先開始鍾意你，但同時我都可以愛你愛到海枯石爛。

再者，某部分人可能連自己幾時跌入愛情陷阱都唔知道，可能系發生某件事之後，先至頓覺「咦？我好似鍾意咗佢～」，所以要追溯幾時開始鍾意，其實有啲困難，因為感情大多系一點一滴累積。當然，都有機會系一見鍾情，只系好膠少咯。

唔知道情況之下一定要回答嘅話，一般人都只好亂作一通，醒目嘅會講得誇張啲，通常都可以換到一個受寵若驚嘅表情或甜笑，順利過關；老實嘅會直接答：「我唔記得啦～」應該系必死無疑。

有時候女人睇上去麻煩但其實某程度上亦比較簡單，只要講得誇張一啲，（懶）誠懇一啲，就可以輕鬆過關。兩個人一齊，無非都系想開開心心，都無謂故意去刁難對方嘅，因為有時硬要爭落去嘅話，贏咗都未必開心。

相愛容易相處難，當中需要好大嘅包容，為咗簡單無聊嘅問題而傷感情，何必呢？愛情不能計算，亦不能量化，付出同收穫唔一定成正比，分分鐘成反比，所以越理性越會計算嘅人喺愛情中亦比較容易瀨嘢。其實愛好簡單，只要大家相愛，自然會處處為對方著想，即使一齊食個車仔面或者捱下M記，都會覺得幸福無比。

轉載請註明來源：今天頭條