其實TVB「煩膠」何止蔡思貝，近年出現咗好多令觀眾覺得好「煩膠」嘅藝人，以下五位就系成日俾香港網民擺上台嘅對象（排名不分先後）：

1. 陳凱琳

其實小編覺得陳凱琳喺《四個女仔三個BAR》嘅演出，對新人嚟講都算不錯，比起同期蔡思貝主演嘅《衝線》好得多，小編當時亦都大讚呢個新人，可惜佢第二套《張保仔》做咗女主角「黃娣妹」就出事喇。演技麻麻，仲俾網友諷刺佢表情同動作都浮誇造作，擠眉弄眼似足迪士尼動畫公主，演技無層次無深度，兩分鐘尖叫20次，耳膜都俾佢震穿，好「煩膠」！就連「三帝」黃秋生都忍唔住要指點下呢位後輩。

2. 阮兆祥

阮兆祥本來都屬於少數有個人特色嘅演員，可惜自從「福祿壽」之後，笑功已見底，來來去去都系果啲令人凍到震嘅爛gag，有香港網民認為佢急才欠奉，喺啲「無稿節目」只識搞爛Gag。而且佢仲會將果啲爛Gag不斷循環再用，講完得佢自己大聲「鳩笑」，其他人根本唔覺得好笑，日日炒冷飯，好笑先奇！慢慢就咁變成咗「煩膠」。

3. 吳若希

吳若希「煩膠」嘅形象嚟自：A)TVB劇集歌曲；B)《街頭魔法王2》。先講下TVB歌曲，一首《越難越愛》隨電視劇《使徒行者》爆紅而喺觀眾心目中成為咗年度金曲，當時每集都會播出好幾次，加上本身歌曲唔俗，成功令觀眾入腦。

但系之後TVB換湯唔換藥，喺每套劇不同時段都不斷loop主題曲、片尾曲，當中梗有唔少系吳若希主唱，例如《衝線》、《武則天》、《實習天使》等，令觀眾由受落變反感，而吳若希就成為咗主要受攻擊嘅對象。

不過，講到吳若希成為「煩膠」嘅代名詞，節目《街頭魔法王2》可話系居功第一，因為喺魔術師表演完之後，佢硬系要加翻句「點解嘅？」或者大嗌「好犀利呀！」，嘈生曬，成功成為咗新一代「煩膠」女神。

4. 梁烈唯

其實小編一開始對梁烈唯完全無乜唔好嘅感覺，可惜自從佢上位後變咗喇～喺《使徒行者》做「木虱」，演技浮誇、刻意模仿張家輝「化骨龍」令好多觀眾大嗌啃唔落。

5. Bob 林盛斌

同屬「兄弟幫」嘅阿Bob林盛斌其實做搞笑角色都得得地，小編對佢都無乜特別反應，但唔知點，見到佢做主持就開始覺得佢好鳩煩，聲大大，仲要來來去去都系果幾句，雖有少少急才，但「一輪咀」嘅說話方式實在有啲令觀眾難頂。講到阿Bob最煩膠的經典，又系《街頭魔法王2》：「俾啲掌聲啦！」

終極「煩膠」王：May姐

May姐可話系煩膠界嘅始祖，當年《May姐有請》嘅「雞汁May」真系街知巷聞，仲搞到TVB俾香港網民笑系「雞汁台」，因為當年佢主持嘅飲食節目由於有雞汁贊助，所以無論煮乜嘢餸都要落雞汁，連嘉賓嚟煮都被要求落雞汁，記得當時小編仲同屋企人打賭，佢煮甜品唔會落雞汁，點知「Anything is possible」嘅May姐一樣可以照落雞汁，小編真系睇低咗佢。不過May姐「煩膠」嘅形象，梗系佢嘅招牌笑聲，簡直比「家燕媽媽」有過之而無不及！

金句王

微信號：jinjuking

轉載請註明來源：今天頭條