蘭桂坊夜店近年生意火爆，甚至有集團策劃上市，人氣爆燈，其中一個原因是利用一班模特兒扮客，搞旺氣氛。
夜蒲蘭桂坊成為近年熱潮，加上喜愛夜蒲系列電影推波助瀾，造就蘭桂坊 club場生意大增，週末假日更是人多到針插不入，其中最多索女之地，首推擁有 Magnum Club、 Beijing Club和 Billion Club的 Magnum集團，近日該集團更籌備上市，計劃今年底前掛牌，若然成事，將創先河成為本港首間上市的夜店。
Magnum成功的秘密，主要因其行政總裁黃熙仁（ Rocky）經營夜店亦別有心得。所謂店內靚女雲集，原來是他利用一班靚模「扮客」冧仔，晚晚推銷近三千元一支的香檳劏客，短短六年間為 Magnum集團帶來暴利，其他 club場亦爭相仿效。
記者直擊這班劏客女，如何在燈紅酒綠中「搵水魚氹傻仔」，當中有人向本刊爆料，她們為了跑業績，也不惜扮可憐、施嗲功，甚至跟客大跳辣身舞，施盡渾身解數冧客買香檳。
每逢週末門外都現人龍，比羅湖海關還熱鬧。
蘭桂坊目前「熱爆」的 club場，大大小小約有三十間，其中 Magnum集團的 Magnum、 Beijing最好生意，每逢週末和假期，門口更誇張到出現人龍等入場。即使每位入場費要四百元，開貴賓檯最低消費要七千元，一眾蒲精仍是前仆後繼等入場。
直言視 Magnum為第二個家，週末「唔蒲唔安樂」的蒲精阿 Sam，本身任職金融業，一說到自己多年蒲經就興奮莫名，「飲酒返屋企都得啦，落 club為咩啫，溝女，攞 face吖嘛，呢個場最多索女，獵到女神機會高好多。」他說最重要是把不同索女合照擺上 facebook曬命，「 Post張合照相，一句喺 club溝到個女神，閒閒哋多幾百個 like呀」！
Club場花錢如流水
劏客女開工前於舞池扮客，要等人多時才入戲扮 high。
Club場是燒銀紙的玩意，一杯用來「漱口」的 Long Island雞尾酒也要一百五十元，一支 1.5升的 Moet& Chandon香檳「見得嚇人」也要二千九百九十元，一晚少說也要數千元消費。花錢如流水，由於 club場玩家的潛規則是「有檯有實力」，大家藉著檯上香檳炫耀、比併身家，香檳於是成了獵女的必需裝備，所以不愁銷路，「除非好靚仔，否則難得有個女仔肯坐在你身邊，為扮豪，開酒花錢自然好似倒水咁快。」
業內人士 Kat姐直言，早在兩年前， Magnum的大股東葉茂林（耀才證券主席），已有意將旗下 club場搞上市，身為其軍師的行政總裁黃熙仁（ Rocky）就獻計，通過一間製作公司 Club Kingdom名義搞旺場，藉此吸引多些男客消費。該公司於是成立 Model Department，聘請約三十名在娛圈不紅的靚模扮客，混入店內冧仔買酒。
索女假 clubbing
她們在工作上名為 display model，每晚「滿場飛」找尋獵物，但不少客人根本不知她們在開工，因她們的性 感打扮與女蒲友無異，還以為飛來艷福，香檳開完一支又一支，「呢招好聰明，男客落 club為溝女，滿足虛榮心，有班女在推波助瀾，開酒自然爽手啲。」此外一些熟客雖明知這班 model的身份，但帶一班朋友來消費時， model也識趣主動上前應酬助興，有面之餘也不介意幫襯買酒，故生意愈做愈旺。其他 club場見此「造市」招奏效，亦紛紛仿效，一時間，整個蘭桂坊出現索女雖多，但不少都是來開工的假象。
廿多歲的 Kinki曾經在 Magnum做 display model，她透露時薪有二百四十元，一個星期大約返三晚，每晚四個半鐘，單是底薪已有一萬三千元，「閒日冇乜客的時候就扮花樽，在吧檯企嚇，在舞池跳舞，營造索女滿場飛的效果，不過主力都係 sell酒，每支酒大約抽傭 5﹪，連佣金計，一個月收入都多過二萬元。」
劏客三部曲1.Wolver（左二）和其他劏客女在吧檯狩獵。
2.開始拗腰嗲客。
3.跟經理對數，點算當晚獵獲佣金。
搏殺格月入近三萬
劏客女晚晚換上戰衣，出發開工。
每個 model都有自己的劏客撒手鐧，各靠外形、嗲功，或玩得夠癲夠放， Kinki強項是樣子清純，看來沒有殺傷力，原來亦是劏客高手。她自爆專向樣衰、孤獨精落手，更作一個 KO手勢解釋自己的必殺技，「例如條友霉咗成晚，突然有個女仔主動過來，同佢傾偈，佢一定笑曬，當佢問我飲咩，我就話香檳，男人通常要面子，孤獨精更加唔識反抗，一句冇問題，搞掂！」
記者多晚在 Magnum、 Beijing觀察，發現每晚凌晨時分，都會有養眼的劏客女乘搭職員專用的電梯，到威靈頓廣場五樓 Magnum工作間打卡，該處保安嚴密，有南亞裔保安員看守門口，約十五分鐘後，她們換上性 感戰衣落樓，然後按更表到集團旗下不同 club場上班。
Kinki解說， Model Department的管理很制度化，她們上下班都要「嘟指模」打卡，跟更表到不同的 club場賣酒，客人賬單會註明她的藝名，以便計算成績和佣金，「有專人做統計，計每個 model業績，唔合格下星期就會消失。所以每個女仔一星期都開到幾萬元的酒，但真係超大壓力，有時會叫朋友上來玩幫手跑夠數。」而為了加強劏客女的推銷本錢，符合集團的高貴形象，公司還特地聘有髮型師、化妝師為她們扮靚，又會開班教授劏客技巧。
直擊冧客開香檳
萬聖節前夕，記者目睹五名劏客女頭戴紅色魔鬼角頭飾，浩浩蕩蕩往 Magnum開工。由於蒲精仍未「報到」，劏客女於是在舞池上扮客跳舞，可能返一行厭一行，各人都神情呆滯，只有當中的 top sales Wolver自得其樂扭動蛇腰。「 Wolver解獵狼者，改得呢個名，可想而知賣酒幾拼搏，佢嘅舞姿好誘惑，加上樣子甜美，嗲功一流，一個星期可以跑到廿萬數，所以公司特別恩准佢返五日工，月入三、四萬元。」 Kinki說。
凌晨一時半，客人愈來愈多，劏客女陸續找到獵物，其中有巴西血統，擁有夾死螞蟻上圍，綽號「愛美神」的劏客女率先跑出，在吧檯成功搭上兩名黑人客，只見「愛美神」施盡渾身解數，與客人大跳辣身舞，其間一名客人更從後不斷用身體磨她的臀部，十分意淫。辛苦得來有回報，該客在兩小時內開了三支 Dom香檳，埋單約一萬元。
到凌晨四時收工，劏客女聯群結隊，乘搭職員專用電梯，返回工作間，十五分鐘後她們換上便裝，離開公司一起去消夜。
豪客會藉著檯上香檳比併身家，有時更會要求經理安排 model（左三）坐檯搞氣氛。
中介人不時在龍友討論區招聘「扮客」 model，還表示可介紹飯局。
收據上詳列了扮客 model的名字，以方便計傭。
難以守身如玉
Kana爆料會把香檳倒掉，以免飲醉。
「其實公司都怕影響形象，所以嚴禁 model同客人有親密接觸，唔准攬仔、錫仔，親密合照都唔可以，仲講到攬一下就罰一百蚊，以免俾人覺得個場低級，但現實歸現實，守身如玉點跑到數，所以上有政策，下有對策，經理隻眼開隻眼閉。」 Kinki說，其實部分 club場老手都知道劏客女的存在，但有時宴請大班朋友，想有索女助興，陪飲陪玩，於是會要求相熟的劏客女替他開檯搞氣氛，讓她在當晚的賬單抽傭作酬勞。
而港男心態，付四百元入場費，總希望取回「著數」，甚至更多的回報。另一名劏客女 Kana對此坦言，食得鹹魚抵得渴，預了給客人抽水，「啲客通常會愈挨愈埋，攬嚇腰搭膊頭，搭膊頭仲可以接受，但攬腰通常會縮。最憎鬼佬客，成日以為香港女仔好開放，試過有客攬住我條腰，已經縮緊，點知一手揸落我 pat pat，嬲到爆。對住只抽水，唔開酒嘅客，會故意黑面求甩身。」她說時四周睨一睨，一臉不屑。
劏客女通常月入兩萬多元，但很多 model除了賺佣金外，還有另一個想法，就是希望藉助 club場這塊踏腳石，有機會結識經常夜蒲的電影圈監製，甚至可被富二代看中，飛上枝頭變鳳凰。「 Niki以前是間 club的 model leader，之後被人賞識去咗拍電影《夜蒲三》，另一個 model最近仲辭咗工，話要準備選亞姐。」由於跑不夠數炒魷，也少了上位的捷徑，故一班劏客女平日都施盡渾身解數，以保住份工。
為免飲醉「蝕底」，劏客女也有絕招自保，就是經常暗中把酒倒掉，「成晚咁長，飲唔到咁多，通常趁客人不覺，偷偷倒酒。」 Kana陰陰嘴笑，男蒲精掏光荷包為求她們一笑，結果卻想不到幾千元一支酒倒入了冰桶。
上市益大股東骨水
就搵靚模扮客谷生意的手法，記者上週一連幾天在中環等候搞手 Rocky的出現及其回應，但他一見記者出現，即駕車高速駛離現場。週日記者致電他的手提電話，他一聽是《壹週刊》訪問，便即匆匆掛線。
Rocky曾向外自言當辦公室助理出身，後因炒賣成衣配額而賺了第一桶金之餘，還因此結識了不少紡織界富豪，之後他不但拉攏富豪友人打本給他搞夜場，還積極炒樓，但次次他都是衰收尾。
由一九九四年的加州豪園，至青衣盈翠半島、灝景灣、荃灣愉景新城等，當年 Rocky不時以炒樓專家口啓向傳媒放風，最高峰時期，所持之物業總市值高達二至三億元。及後更參與炒籌活動，曾大手入票六十張認購維港灣、又入票四十張認購九龍站漾日居，連元朗御豪山莊也入票逾六十張，但九七樓市爆煲後，他即忽然變得低調。翻查記錄，由○二至○四年， Rocky有份參與的炒賣物業，有些已被人入稟法庭及成功收樓。
AMTD證券業務部總經理鄧聲興曾表示，夜店上市「一定有得做」，他指出夜店業務擁有強勁現金流，況且飲品毛利非常高。不過，他認為夜店生意存在一定風險，維持客人的忠誠度是十分難，因新鮮感一過或有新的競爭對手出現，夜場每每會因而盛極而衰。
有不願公開姓名的財經分析師指出，夜場上市最終是益了大股東骨水走人，而他對葉茂林吹捧夜店概念更是不表認同，「其實大股東過度樂觀，佢話經濟差唔影響夜店生意，點會無影響呀？經濟一差，奢侈品往往首當其衝，除非真係有人 clubbing當飯食，唔蒲唔得咁就無影響啦。就算單以財經角度睇，夜場生意係好高波動性，夜場股票值唔值自己決定啦，不過我唔會搏呢啲股票囉，萬一間場酒牌續唔到，就差不多等於執笠，酒牌唔似澳門賭牌一簽就十年八年呀！」
葉茂林與 Rocky因早年炒賣成衣配額而認識，後更打本給 Rocky開夜場，自言愛蒲的葉對夜場生意甚為樂觀，不單計劃在蘭桂坊再開新場，更想將之擴展至內地。（《蘋果日報》圖片）
導演錢國偉（左）推動蘭桂坊夜蒲熱潮，夜場搞手 Rocky（右二）亦常伴其左右出席活動。（《蘋果日報》圖片）
Club場酒水賺暴利
本港 clubbing熱潮早於九十年代已興起，蒲友會遵守嚴格的 dress code，穿著整齊的蒲衣到高級裝修、播放外國音樂的 club跳舞狂歡兼識人。當年較知名的 club有 Canton等，都是娛樂圈中人慶功宴、搵工作機會的場所。
香港酒吧業協會副主席錢雋永表示，金融風暴後經濟蕭條， club場沒落，檔次較低的 disco取而代之，例如 348等冒起，令 disco淪為毒販散貨場，經警方大力掃蕩，不獲發牌，逐漸沒落。○七年，隨著經濟漸漸繁榮，投資者轉為在中環蘭桂坊重搞 club場，一洗過往 disco烏煙瘴氣、品流複雜的形象，改走高檔路線，更與電影公司合作，拍攝有關夜蒲的電影。錢雋永說，劇中宣揚消費得起，自然識到索女的訊息，備受年輕一輩追捧。
他又稱，受這股熱潮刺激，蘭桂坊 club場愈開愈多，大大小小的場約有三十間，原因是開 club場搵到快錢，利潤奇高，「最搵錢係酒水，一杯 coctail成本不到十元，但售價至少一百元，大酒利潤亦有三至五倍，以一個萬呎的大場計，在星期四、五、六的旺日，約容納六百人，以人均消費一千元計，一晚就有六十萬元營業額，當然亦要扣除鋪租、人工等開支，但利潤仍然和味。」
轉載請註明來源：今天頭條