屈女士話後生仔唔捱得，好多人出黎力保後生仔。

但系如果你系管理階層，對過後生仔，你就會發現，後生仔，真系有好多「廢青」……

讓柳臣冒天下後生仔之大不諱，盡數「廢青」七宗罪：

【罪名一‧Hea】

出奇地hea，咩都沖死線。Hea唔系唔做野，而系個心覺得件事做唔做得成都冇所謂，唔上心，唔著緊。Hea到尾交份垃圾上黎，自己都仲可以覺得冇所謂，結果連累埋全個團隊。

【罪名二‧冇常識】

如果你帶過Ocamp，你就會見到凍水泡公仔麵既天才。唔識打呔，除左打機之外咩都唔知。之前新聞講有個女仔WhatsApp即時辭工仲叫老闆出埋份糧比佢。呢類新聞幾乎隔日就有，有Ｄ青少年的常識低得可怕。我還見過不會綁鞋帶的。有時指派工作給佢地，佢地就拖到最後一秒先做，你唔知我收左你份野我仲要執你手尾架咩？

【罪名三‧冇交帶】

冇責任感既後生仔最常見，見一個想打一個。冇交帶體現系佢地冇時間觀念，成日遲到，唔覺得遲到系大問題。叫佢做既野唔記得咗，或者突然冇咗影，搵又搵唔到佢，到佢出現番，問佢去咗邊，又話冇去邊。一個人有冇交帶反映出佢做野既心態，自我中心既人總系覺得自己鍾意點就點，完全唔洗理其他人。最後叫佢做野仲辛苦過自己做埋。

【罪名四‧自以為是】

唔識唔開聲，以為自己搞得惦。搞唔惦又唔會開口問，等到人地發現佢未搞惦，佢先話自己唔識做。一系就自己做做錯曬！唔知以為佢啞既！結果反而加大咗其他人既工作量。

【罪名五‧眼高手低】

成日想一步登天，以為自己系不世奇才，又唔知自己蠢，又唔努力。一開始將個目標放到鬼咁高，最後實做唔到。講又唔信，結果又系臨事改計劃，費時失事。

【罪名六‧三分鐘熱度】

一開始既時候總系講到自己好有興趣，做唔夠兩日就開始懶，唔單止做野系咁。連改善都系咁，出錯既時候就誓神劈願話會發奮改過，但冇幾日就故態復萌。做野冇堅持，又求求其其。成日本住「做唔到又唔洗死」既心態。正一廢到核爆。

【罪名七‧死唔認錯】

衰咗第一時間推三推四，又天時又地利，陰陽五行咩都數曬出黎，就系覺得唔關自己事，唔肯認系自己衰。件事系你分內既工作，做唔成就系你既責任，凈系識推卸責任。其實好簡單一句：點解你會做得咁差？因為你冇常識hea冇交帶自以為是眼高手低三分鐘熱度囉！唔關其他人事，唔關天氣事，更加唔關命數事，一個唔聰明又唔努力既人點會做得成事呢？

釀成七宗罪的原因有很多，溫室小花，獨子，怪獸家長，教育制度，這裡不再一一分析，但只要你犯了這七宗罪，而你又未系好老，你就系一個名副其實的廢青。作為一個青年人，應該時刻檢討自己，多多反省，不要成為廢青。

轉載請註明來源：今天頭條