「巴打」飛撲上前「捉」Bosco。

「巴打」完全唔聽Bosco指令，好似唔記得咗Bosco係邊個咁。

女神朱千雪(中)出場啦。

大台劇集《警犬巴打》一眾演員黃宗澤(Bosco)、朱千雪、古明華、張嘉兒、陸永及明星警犬「巴打」今日齊齊到尖沙咀The One出席劇集宣傳活動，不過唔知係唔係太耐冇見Bosco，「巴打」一見到Bosco拎咪講嘢時，就即刻飛樸上前，十足十喺劇集中英勇捉賊時嗰樣咁，搞到Bosco要全程背向鏡頭，唔俾巴打見到支咪，之後Bosco就解釋話巴打當咗佢支咪係玩具，所以有呢個行為。

活動期間，當Bosco拖住巴打出嚟，拎住支咪開始講「而家個個都......」嘅時候，巴打就一嘢飛樸上Bosco度想搶咪，現場都即時傳出「嘩」聲，各位觀眾似乎都幻想唔到巴打同Bosco竟然咁樣交流。有見及此，Bosco立刻以嚴肅態度喝止巴打冷靜，巴打初時都好聽話，聽到Bosco指令後都乖乖「sit down」，但當Bosco再用咪想講嘢時，巴打又想再次跳上去樸咪，Bosco完全無符咁講:「佢死都要當呢個咪係玩具，俾番你呢個咪。」唯有將咪交番俾工作人員，喺無咪之下宣傳劇集。後來Bosco都有同巴打玩遊戲，不過巴打好似完全唔受Bosco控制，叫佢做乜都唔聽，最後要巴打主人出場，巴打先冷靜落嚟，睇嚟巴打好似唔記得Bosco係邊個喎。

Bosco餵女粉絲食元宵湯圓，粉絲個樣甜到漏啦。

真係想知婆婆最後食咗幾多粒湯圓。

適逢今日係元宵佳節，大會都安排一眾演員同現場觀眾齊齊搓湯圓慶祝元宵，搓完湯圓後更由演員親手餵被邀請上台嘅幸運兒食湯圓，但高登正評女神朱千雪就相當搞笑，未等及俾現場記者朋友影相，就急不及待餵被選中的婆婆食咗2粒湯圓，要兼任MC嘅楊瑞麟叫停朱千雪俾大家影咗相先餵，真係盡顯傻大姊本色，唔怪得咁多高登巴打LIKE爆你啦。

文章來源: https://www.twgreatdaily.com/cat99/node913727

轉載請註明來源：今天頭條