呢件事係我同我前男朋友嘅經歷，我同我前男朋友拍左三年！我哋原本係同學黎嘅，嗰時都係一班朋友一齊玩，

不過之後大家畢業後，我哋都無再聯絡了，直至幾年之後，係一間新公司竟然撞返，當時大家都覺得大家好有緣份，

而且晏晝我哋又一齊食lunch，又成日講返係學校嘅事，好快九秒九我哋就一齊左，開頭我覺得佢真係好叻架，因為佢係畫畫嘅，

佢畫畫真係好靚，讀書嘅時候老師都已經好睇好佢，覺得佢將來一定會唔錯，大約拍咗半年到啦，他一直都冇帶我去佢屋企，

當時我都真係覺得好奇怪，但係又唔好意思問，點解佢從來都唔會帶我見佢屋企人嘅？有一日我終於忍唔住明示暗示問過佢過佢類似嘅問題，

他同我講佢媽咪希望係結婚嗰個先帶返去，不久之後新年，佢就帶我去佢屋企拜年，順便當見家長，我記得個日係星期六，

放工係放兩點，放工後我哋本來食完lunch就直接去佢屋企，之後去到去屋企樓下，他打俾佢媽咪話佢而家同我上去，

佢媽咪就叫我哋係樓下大快活等下先，唔好上嚟住，老實講係嗰嘢我覺得真係好古怪，其實佢一早知我哋會來，

同埋個下我哋已經到樓下啦，他媽都堅持我哋喺大快活等，之後我男朋友就陪我坐係樓下大快活等到七點，

之後佢阿媽打嚟話不如食咗飯先上去啦！我哋就繼續坐係大快活度等到七點半，佢阿爸都放工，再轉去茶餐廳等，

大約八點，終於成家人到齊，咁大家都係門面野有講有笑，食完飯之後，佢阿媽叫我上佢屋企坐一陣，之後大家再傾下計，

阿媽再叫佢個仔送我返屋企，咁件事都OK啦！

之後我問返其實點解我地要去大快活坐幾個鐘呢？我男朋友嘅回應係佢媽咪想執靚啲間屋等我去坐，

我個心係覺得好奇怪，不過覺得個個人都有自己嘅處事方式，習慣，所以都唔好再提啦，亦因為咁，我都好少上去佢屋企，

同佢屋企人都係大約係一年見一次，拍咗一年到之後，他就辭咗職，開頭就話想休息下先搵工，

後來搵工又好似搵唔到一份啱佢嘅工作，有一日他打俾我同我講，話好想同我有將來，想賺多少少錢，

想再叻d,佢話想去澳洲working visa!儲錢結婚，講真果下我梗係唔想啦，如果大家係要儲錢結婚，大家係香港打份工，

點會儲唔到錢姐。佢聽我咁講件事就完咗，又過左一輪，佢同我講，佢媽咪叫佢瞞住我偷偷去搞簽證，

老實講果下我真係好興，有因為呢個問題鬧交，不過去到最後，我知佢媽咪係真係好想佢去，想佢長大，

如果我堅持唔俾佢去，我相信佢個仔都會唔去，但係唔阻同你媽咪嘅關係就好差，我又諗其實都係一年啫，

就當中一年嘅時間睇睇其實大家嘅感情係咪真，如果一年都等唔到，其實都唔係什麼真感情，不如算啦！

之後佢去咗澳洲啦，就算因為時差問題，日日都有打俾我，大約過咗半年，佢突然同我講新年就返嚟，

因為佢細佬突然肚痛入咗醫院，佢細佬因為由禦酒，所以冇得camp保險，香港人係澳洲睇醫生住院其實係超級超級貴嘅事，

佢哋住咗兩日醫院，用咗超過八萬蚊，一出院佢哋嗱嗱聲book機票返嚟，你問我開唔開心，其實都開心嘅，話曬都冇見咁耐，

其實我內心都好鄙視佢，因為原本定左年，諗住去學野，賺下錢，學獨立，因為佢去澳洲嘅錢係問親戚資助的，

唔夠半年就返嚟其實都幾樣衰，咁呢個澳洲之旅邊上係浪費左一筆錢，而且住的地方，佢哋又唔肯做唐人區，

或覺得有中國人住嘅地方唔好，又要同d外國人一齊住，變相又貴左好多啦，都算啦，做嘢方面辛苦嘅唔做，無聊嘅唔做，

成個打工皇帝咁，到最後半年都唔夠就返咗嚟啦！返到嚟香港啦，我擔心的問題又再出現啦！又係重複擔心佢點樣搵工，

佢又唔積極去見工，左揀右揀，日日顧住係屋企健身做gym ,無所事事，過左成大半年先搵到一份稍為穩定嘅工，

之後我又開始再重問結婚嘅問題，我問佢如果結婚將來我哋住邊，1.申請公屋（但我哋兩個加埋嘅入息已經過咗，即係冇得申請啦。）

2.抽居屋（抽居屋要抽好多年。）3.買私人樓（而家淨係首期+裝修+雜費，都差唔多成100萬）4.租屋（好似幫人供樓咁，如果有首期當然自己買好啦），

不過如果冇首期的話，呢個都係一個辦法囉）之後佢竟然答我買樓，我問佢咁買邊區好啊？

佢同我講住近啲你嗰面啦，因為你嗰區d樓比較平，因為始終係舊區，咁樣我哋嘅負擔都冇咁重，

我心諗都係一件好事，之後佢話如果經濟好啲嘅話佢可以買美孚新邨，講真啦，其實我諗都冇諗過買美孚新邨啦，

因為都真係幾貴㗎 ，但我聽到佢咁講，即時佢都相信自己有呢個能力，我都覺得好安慰，都放心架，

我再問佢洗唔洗要我同你一齊俾首期，因為要去一個人出曬其實都真係好吃力，我一直認為一頭家係大家都有份嘅，

我唔介意大家一齊分擔，佢又話放心啦唔使架啦，他一定會比幸福我！之後我媽咪就開始幫我留意一啲又平又靚嘅筍盤，

準備搵到間係二百幾萬，有陽台，五百幾呎，有近我屋企，其實都真係可以講係筍盤嚟㗎 ，最尾我同佢講，

搵日我地去睇一睇間屋，唔一定要買，但係好似連睇都唔想睇，我問佢係咪擔心首期嘅問題，我問佢你而家有幾多錢，

有冇100萬，佢話差少少，80萬呢？都係答差少少，我再問，50萬呢，都係差少少，30萬有啦？都係差少少。

個下我真係覺得好絕望，好嬲，我覺得如果你30萬差少少， 100萬你有乜可能係差少少！

一直以來我同你嘅問題都係為住屋嘅問題而煩惱，到最後我哋竟然連結婚嘅錢都唔夠，我真係覺得好絕望，

早在一年前，我以同他說不如大家可一個聯名戶口儲錢啦！兩個人一齊儲點都快過一個人儲，而且他又唔洗咁大壓力，

但佢同我講佢啲錢比阿媽儲，媽咪會幫佢，叫我唔使擔心，做個開心嘅新娘就夠啦！之後當我發現佢原來連結婚嘅錢都無，

我問佢老老實實你而家有幾多錢，佢答我大約十幾萬左右，之後我哋開始又見面，一來又想他搵工啦，二來我又唔想嗌交，

一日佢約咗出嚟食飯，再俾我知道原來佢個戶口根本連十幾萬都冇，我今次堅持要去比戶口我睇，佢其實只有八萬蚊，

我個下絕望，決定分手，之後佢話每個月比＄5000我儲，我哋儲多一年就可以結婚，但我覺得唔係呢個問題，

問題係我覺得呢個男人冇承擔，我唔想結咗婚之後，我好似湊仔咁，坦白講，我唔係港女，我唔係要個男仔好有錢，

好靚仔，一定要有車有樓，一開始佢同我講無錢，大家要一齊儲，租樓， 甚至唔擺酒，其實我都唔係好大問題，

但係佢一直講大話，一直充，到咗未真係要攞錢出嚟，就此一個炸彈咁爆左，原來所有嘢都係充出來！

同呢個男仔分左手之後，途中我試過參加speak dating ,呀媽又有介紹男仔比我，朋友又有介紹，

不過都好似唔係咁啱咁，之後我有個同事約我去台灣散嚇心，就係嗰度識到我而家嘅男朋友，

我覺得佢對我真係好細心，好好，最緊要係是目標一致，踏踏實實，唔會咩都係充，冇迷冇law,冇嘅話咪大家一齊努力囉，

所以我都好想同啲姊妹講，如果當你同你男朋友覺得有咩問題嘅時候，真係要立即講出嚟，如果發覺真係好唔對路係真係要走架，

如果唔係就好似我當初咁無啦啦曬咗成三年嘅時間！呢個真係一個陰影！好在我而家嘅男朋友都對我好好，我都覺得好安慰。

轉載請註明來源：今天頭條