新年冇拖拍，日日傍住妹妹衞詩 hea爆又一城，肥咗嘅衞蘭喺連鎖店專攻肥人恩物黑灰色鬆身衫。
甩黎明消失半年 愈減愈肥 脹爆衞蘭：依家唔睇磅數
黑暗過後，就是黎明？錯！呢句說話擺喺衞蘭同 JW身上應該調轉講，擺到明脫離黎明有運行至啱！改簽新公司， JW新歌〈矛盾一生〉點擊超過 400萬，衞蘭亦都唔弱，帶埋胞妹衞詩過檔華納即享一姐待遇，新歌新碟好快面世。
前途冇咗黎明，當堂一片光明，心廣體胖亦都理所當然！新正頭日日做 gym又戒口，肥底衞蘭愈減愈肥，好彩家陣個老闆唔再係金句王，唔使俾人笑肥過部機車！
12年前黎天王大張旗鼓，又搞唱片公司又做經理人，係威又係勢。可惜天王葫蘆裡賣咩藥唔係人人都明， 12年後藝人歌手連老婆都變前妻各散東西， A Music名存實亡，歌手藝人星途總算有轉機。潛水半年，衞蘭去年宣布簽約華納唱片，總算又有一姐做。
初五終於放完假開工錄音，衞蘭雖然尷尷尬尬唔敢提磅數，不過就自認身體健康，期間次次聽到前老闆黎明個名都開懷大笑。
一提新公司話熱鬧好多，齊齊簽入華納的衞氏兩姊妹的確好有歸屬感，新年出力打扮參加新公司化妝派對。（網上圖片）
與舊公司滿約後衞蘭消失大半年，最多都係傍住妹妹欣賞圈中好友演唱會。《蘋果日報》圖片
脹番 2個碼
做咩都一齊，過檔亦都齊齊過，衞蘭新歌被唱片公司視為 16年大 project，於是慢工出細貨，新歌一推再推暫定過年後才推出，今個農曆年衞蘭樂得逍遙全天候放假，直到年初五(12日)才正式復工錄音。
未到宣傳期，又絕少在公開場合蒲頭，衞蘭個人社交網絡日日動向唔係打拳就做 gym， Selfie角度又攞得夠靚，人人以為新公司新面貌衞蘭終於減肥成功。誰不知俾《 FACE》野生捕獲兩姊妹閒遊又一城，妹妹衞詩已經肥腫難分，家姐衞蘭再大多兩個碼，說好的瘦番變單車呢？
瘦完反彈
六月轉投新公司，靜休一排的衞蘭一度狀態大勇瘦番變單車，誰不知掛住錄音唔使見人又再反彈。（網上圖片）
妹妹衞詩（右）都仲識戴帽又戴超盡量低調，脹爆衞蘭反而肥腫難分又素顏，果然經已「瘦」夠。
面腫眼腫，排在人群中㩒機攞錢都冇乜人認到衞蘭。
唔敢食爆谷
冇拖拍、錄音室又收爐過緊年，同妹妹同住嘅衞蘭，幾乎日日都由大圍福來別墅駕車至又一城消磨全日。
其實減極都肥，好明顯唔係忍唔住口！復工錄音前一日，年初四去超市買餸煮飯，衞蘭成車都係西芹生菜，零食加工肉一樣都唔敢買！再前幾日經過美式爆谷名店，兩姊妹雙眼發光想幫襯，點知入鋪頭猶疑幾分鐘，都係帶住一臉罪過運桔離開。陰功喇，細細袋爆谷都唔敢食，最慘係忍得咁辛苦都係瘦唔番吖嘛！
7/2
行到美式爆谷店，兩姊妹一度口痕想食爆谷，不過猶疑幾分鐘，最後都係忍住口兩手空空咁走。
11/2
專攻蔬菜都肥？
乜運動都做齊，買餸又係清淡健康為主，行勻一大圈都係買得蔬菜同麥包。
「唔知幾多磅」
比起往年被野生補獲一係狂隊魚蛋燒賣，一係踎商場食零食，今時今日嘅衞蘭真係好忍得口。
減極都肥、忍口又辛苦，不過你估佢唔到，衞蘭心情反而史上最靚。上週五（ 12日）復工錄音，衞蘭停完車對住記者不知幾健談，短短五分鐘騎騎放聲笑咗十一次！
F：《 FACE》衞：衞蘭
F：冇跟黎明係唔係好好多？
衞：哈哈哈……新公司好多同事，好多 Artists，熱鬧啲！
F：點解新歌仲未錄好？
衞：因為首歌好另類，試下另外一個聲綫。新公司啲歌唔係淨係愛情歌， personal啲……故事我認同到……
F：舊公司認同唔到？
衞：哈哈哈，新環境要新突破，我唔想咁比較……
F：係唔係愈減愈肥？
衞：哈哈哈……少少啦……我唔知幾多磅，我依家唔睇磅數，想健康啲……
F：仲有冇同黎明聯絡？
衞：哈哈哈……大家都忙，佢又要準備演唱會，我都係睇佢海報至知……
F：黎明以前話你肥過機車喎！
衞：我忘記咗好耐喇……
係嘅係嘅，心情開朗身體健康最緊要！身心健康最緊要係選擇性失憶，唔開心記嚟做乜呢？
肥得健康
雖然望落脹爆，又唔肯上磅，不過衞蘭話嘅「要健康」唔係死撐得把口。由約滿前公司至轉會成年，真係乜運動都做齊，一啲都冇偷懶！
吊住嚟操（網上圖片）
跑步機上（網上圖片）
打到飛起（網上圖片）
舞動肥跡（網上圖片）
成敗黎明
33歲衞蘭， 18歲被黎明發掘時，原職係酒吧駐唱同歌手和音， 04年做咗 A Music頭炮巨獻出道時，一度叫做威脅到天后祖兒㗎，可惜黎天王套捧人大計唔係人人受到又難捉摸，出道 15年都上唔到位都可謂成也黎明，敗也黎明。
《壹週刊》圖片
［一手發掘］
18歲已經為黎明唱和音被黎明、雷頌德發掘，衞蘭簽約後受訓四年學廣東話至正式出道，衞蘭亦不負眾望憑靚聲人氣直逼天后。
《壹週刊》圖片
［捧到天上］
一出道翻唱〈情深說話未曾講〉、新歌 MV又郁啲去紐約拍、後期 CG特效過百萬，當年黎明在衞蘭身上落過唔少心血同金錢。
［一碟笑話］
09年推出大碟《 Wish》，結果封面瑜伽 pose成為全民笑話，長期被改圖嘲笑。由於 A Music出品要老闆黎明點頭，衞蘭形象盡毀當然入埋黎明數。
［一啖砂糖］
黎明出名多金句， 07年評論衞蘭身形時，其實就出於好心，話會婉轉提點衞蘭代言綿羊仔，冇理由身形肥過綿羊仔，結果此言一出，全香港人都知衞蘭肥過部機車。
轉載請註明來源：今天頭條