毒拎呀！毒拎嘅生活經常自己一個，一個人食飯、一個人行街、一個人打機、甚至一個人睇戲……查實一個人睇戲又有咩問題？

純情私樓仔開post，自稱靚仔毒男，經常獨自去睇戲，重話幾遲買飛都總會有單丁位，啱曬即興嘅佢，十分方便！ 毒咪毒囉，又有咩所謂喎！

上一上高登就會發現不少巴絲打經常一條友睇戲，歌仔都有得唱：「其實毒拎一個更開心，洗拎你講。」

好似巴打Dick~咁經常自己一個睇戲，因為「易買位，唔洗夾時間」，冇錯，約齊人好煩㗎嘛！

創聖的大天二就從睇戲嘅本質出發：睇戲根本就係一件好私人嘅事，點解要約人睇？

反正睇緊戲嗰時不宜作交談，睇完又唔係要同人討論。況且，有陣時有啲戲比較合適一個人睇，黃蛙先生話好似《interstellar》哩類戲咁，一個人睇先至有feel！

查實只要你踏出第一步，單獨走入戲院之後，相信你都會對一個人睇戲上癮，大叫好爽呀！巴打卡蘭卡就係咁樣：「自從好耐之前試過一個人睇之後就返唔到轉頭，而家除非有朋友約我睇某套戲先一齊睇，否則所有戲都自己睇。」巴打好有型呀！

不過，部份毒拎巴絲仍然覺得，自己一個人去買飛睇戲，會引來途人奇異目光；俾情侶同家庭包圍住走進戲院，毒拎彷彿顯得額外孤獨！巴打小說話多做事就話：「唔好以為人人都留意到自己，人哋理得你咁多！」其他人未必在意你，你都唔使理人㗎！睇電影，最重要係自己享受睇電影過程，以及電影帶俾你嘅切身感受，與他人無關。既然睇戲本來就係一件好私人嘅事，咁一個人睇戲才是常識吧！

轉載請註明來源：今天頭條