想當年，青姐因為滙控（005）跌至33元流淚。事隔七年，今日滙控一跌再跌，最低更跌至47.8元，或者，你會以為青姐心情會好激動。不過，今日你問佢睇法，佢會話，「呢啲咁嘅股票，你覺得係炒股既人揸架咩，你嫌錢腥，嫌錢多呀？」

依家一股滙豐都冇揸嘅青姐，對於滙控跌到幾多先識停，青姐不以為意，「冇得我覺得，問題係佢自己要跌到幾多，你哋（大戶）想推落去幾多，唔係得覺得架嘛……我哋買滙豐會買輪架咋，唔會揸正股。」

正當記者不斷追問點睇滙豐，青姐無好氣，「香港人只係識睇滙豐，但滙豐只係云云歐洲銀行其中一間，滙豐都未好似瑞信咁，跌到27年低位。」左一句眼界太窄，右一句井底之蛙，她指出，地球上非只有滙豐一隻股票，「你見唔到其他歐洲Bank都平過滙豐？」

語氣帶點勞氣，青姐反問「你係咪好清楚005錢借俾邊個，你係咪好清啲客有冇錢還，如果係好清楚，百分百，咁你咪買，我都no comment，我都做咩要阻人地買，傻既，人地大把錢，坐得起」

鬧完滙豐條數，青姐突然爆歐智華大鈑鑊，「有冇人知，佢（歐智華）做炒房年代，係咪一個好叻既trader？冇人知呀，因為你地冇同佢地對盤炒過，但我哋識有trader係同佢盤，知佢係好渣，連價都quote錯，呢啲你又唔知，只係識問匯豐會唔會到幾多價。」

對於大摩預期，滙控會跌至38元，佢又話，「使乜大摩話你聽，滙豐會跌落去，佢自己會跌架啦。大摩話你聽，即係話大摩後面，有對沖基金，高位已Short緊隻005，可能係索羅斯啲盤。咁唔係咁大個盤房有乜做，刁又冇，IPO又唔覺有。」

轉載請註明來源：今天頭條