金句王，你好：

小弟都就快三十歲，不過就同好多差唔多年紀既男人一樣，鍾意打機，咁之前就買左部PS4返屋企，點知老婆（系，我結左婚）唔比！部機連屋都入唔到！我爭取不果，最後要忍痛將部機放上網賣。其實咁多年一直想問下，點解女人咁唔鍾意男人打機？

機佬 上

*************************

機佬：

女人點解唔鍾意男人打機？咁最顯然易見既原因，就系唔想屋企多樣野同自己爭個老公既時間啦。不過呢樣唔系最重點既。就咁既，呢幾年好多男仔/男人都玩緊一隻game叫LOL，『金句王』唔打機既，不過作為一個走在潮流尖端既小資產階級，都有了解過下啦。呢只Game好能夠睇到點解女人唔鍾意男人打機。

第一，男人打機既時候，會變得好白痴，雖然女人都知道男人系鍾意飲奶既小朋友，但你表現出黎又系另一回事。依家D人打LOL，仲會一路傾計，一路交流戰況，睇下邊個守邊條路，幾時推搭咁，好緊張、好認真架——喂喂喂喂喂！中路！喂喂喂喂，幫拖幫拖幫拖！喂喂喂喂喂！推搭推搭推搭，一場可能打半個鐘，半個鐘都系講緊呢幾句野，女人頂唔順架。

男人一打機，女人就會覺得佢地好小朋友，好白痴。喂喂喂喂！入草叢入草叢！原來走去係為左埋伏人，推搭係為左推下一個搭。但女人系好不解風情既，見你咁投入，佢心裏面會問：「打贏左，然後呢？」你會諗起細個果時，阿媽都用差唔多既語氣同你講過，打贏又點呀仔～～

第二，女人就最唔鍾意D格局細既男人，系男人都鍾意玩架啦，但佢鍾意玩咩都有分別既。鍾意玩女就系仆街花心，不過女人唔會覺得你幼稚；打機就會比佢幼稚既感覺。感覺幼稚自然就感覺唔可靠，女人可悲既動物本能，都系搵緊人依靠，因為生物上佢系遲早會懷孕，懷孕就要搵個強者保護自己。當你溝女，溝緊條女果時，你既不良擅好系咩都好，一比佢知道你鍾意打機，扣二百分啊，慘過你既惡習：食煙、飲酒、夜蒲、玩女。你話緊唔緊要啊。

LOL呢，一打就起碼半個鐘（好似話有快局既），如果兩邊勢力均等，可能會爭持成個鐘都分唔到勝負。咁D好Pro既玩家仲會打完之後繼續傾賽後檢討，D女人真系唔鳩明架！打機者！使唔使咁認真啊！又唔見你班人平時返工做人咁認真？但男人就系咁，女人系唔會明白打機有幾好玩既。

不過依家既手機遊戲，都唔少女人沉迷，可能多少少理解啦，但女人系唔使講邏輯既，女仔會認為，佢鍾意玩game系佢既事，「人地女仔咋嘛」系天大既理由，威力僅次於「好人卡」，但你系男人，男人系應該強，應該聰明，應該格局大，所以男人打機點都系死罪——呢個就系女人既思考模式啦。

鍾意打機就好似鍾意溝女咁，系唔使旨意可以得到女人既諒解，呢D野都系自己搵個方法、搵個地方，偷偷地做算啦……

『金句王』上

轉載請註明來源：今天頭條