是咁的，最近有傳TVB曾勵珍馬房嘅著名「膠劇」監製關永忠本來想開劇搵麥包擔正做男一，再配江美儀，但由於余詠珊、曾勵珍高層鬥法未完，就由黃智賢頂上麥包，令麥包喺TVB生涯28年來首次嘅男一機會都夢碎……但除咗麥包，TVB仲有邊個小生等緊上位擔正？

1. 黃智賢

著名配角：《真情》「阿海」、《潛行狙擊》「辣姜」、《雷霆掃毒》潘學禮

男二演出：《緣份無邊界》「齋強」、《Loving You 我愛你》、《仁心解碼II》「頭Sir」、《食為奴》「四阿哥」、《點金勝手》周辛勇

男一演出：《真命天師》連年、《四個女仔三個BAR》范智毅、《波士早晨》許立喬（被抽起）

即系咁：《四個女仔三個BAR》明顯只系用佢來借力谷4條新女，男一隻系掛名；《波士早晨》成高層鬥爭之炮灰被抽起，今次居然可以執麥包死雞谷上男一。計演技同戲路，值得捧過黃德斌，有待觀察。

2. 陳國邦

著名配角：《流金歲月》司徒佳、《建築有情天》楊子軒、《尋秦記》李斯、《拳王》「細祥」、《絕代商驕》林木森、《大太監》彭三順…

男二演出：《疑情別戀》「葫蘆仔」

即系咁：曾經疑似想做男一而寫公開信離巢TVB，2個月後回巢自稱受曾勵珍同毛舜筠打動而回巢，新處境劇做男二。演技雖然毋用置疑，但暫時做配角搶鏡過做男二男三男四多多聲，希望唔會系下一個黎耀祥。

3. 楊明

男二演出：《收規華》沈一然、《刀下留人》赤知秋

即系咁：2003年曾經捧過，《衛斯理》、《戀愛自由式》做過要角；我覺得佢應該要讀第3次藝員訓練班。

4. 王浩信

男二演出：《換樂無窮》、《貓屎媽媽》、《再戰明天》、《東坡家事》

即系咁：2015年《樓奴》已做過男一；預計2016年會有疑似同鄭伊健《無限復活》電影一樣嘅《EU超時任務》做男一配朱千雪。正劇、搞笑皆能，肯博肯露，有潛力。

5. 袁偉豪

男二演出：《拆局專家》麥行直、《鐵馬戰車》施馬

未出街男二演出：《城寨英雄》、《EU超時任務》、《流氓皇帝》（被抽起）

即系咁：2011、12年曾被輕輕捧過下，在《結·分@謊情式》、《On Call 36小時》做男三；去年年頭《拆局專家》配錢嘉樂，趕客之作。《鐵馬戰車》角色雖然有膠味，但嬉皮笑臉、滑頭表情反而比以往嘅懶正經角色更討好。

6. 羅仲謙

男二演出：《On Call 36小時》、《巴不得媽媽…》、《飛虎》、《飛虎II》、《醋娘子》、《潮流教主》（未出街）

男一演出：《衝線》

即系咁：同黃智雯一樣系潘嘉德愛將；首部男一作品《衝線》，被膠劇監製關永忠同蔡思貝累死仆直。暫時演技平穩、普通、無驚喜。

以下系3位已經上位擔正嘅例子，不過上位擔正又未必系好事～

1. 黎耀祥

成功配角演出：《西遊記》豬八戒、《香港人在廣州》吳堅毅、《楚漢驕雄》韓信、《開心賓館》韓山、《秀才愛上兵》戴從文/戴從武

男一演出：《巾幗梟雄》、《巾幗梟雄之義海豪情》、《神探高倫布》、《載得有情人》、《畢打自己人》、《大太監》、《無雙譜》、《梟雄》等

即系咁：「視帝祥」，算系一個特殊例子，黎耀祥擔正後演技開始見底，選角同演技上亦甚為「錫身」，與以往略帶流氓、爛仔、口臭嘅風格劃清界線。相信觀眾懷念嘅始終系上述幾套配角演出。早前曾公開講過計劃2年後退休。

2. 林家棟

男一演出：《娛樂插班生》、《樂壇插班生》、《大鬧廣昌隆》、《隱形怪傑》、《林世榮》、《布袋和尚》、《茶是故鄉濃》、《酒是故鄉淳》、《美麗人生》

其他：《金裝四大才子》文徵明

即系咁：由茄喱啡慢慢做到劇集單元主配角，1995年《娛樂插班生》擔正上位。一路演技不差，以上亦有幾套叫好叫座，但略缺作為一線嘅說服力，因為《大鬧廣昌隆》、《茶是故鄉濃》、《酒是故鄉淳》都系劇本功勞居多，《林世榮》、《美麗人生》等劇就無法壓場。

3. 黃德斌

成功作品：《真情》「越南」、《金枝欲孽》「小祿子」、《火舞黃沙》宋東陽、《金枝欲孽貳》佟吉海、《心戰》Eric

即系咁：戲路可謂從未變過；喺戚其義、周旭明二人組下嘅配角角色好，演出自然、舒服。不過一脫離兩位「神級」組合，就好似唔系好識演戲，例如《天梯》鄭嬌、《誘情轉駁》高忠榮演出平平。其實羅鎮岳嘅《刀下留人》只系製作認真嘅眼高手低之作，陳耀全嘅《鐵馬戰車》頭2、3集已經不夠力。

講返麥包，做男二曾有《茶是故鄉濃》「大水牛」同《天子尋龍》高力士表現不俗，配角/男三、男四亦有《西遊記》沙憎、《巾幗梟雄之義海豪情》「非凡哥」、《秀才愛上兵》蘇鎮南等搶鏡角色。

不過近年疑似上咗一線尾，所拍之劇都偏悶，例如《耀舞長安》、《心路GPS》、《陪著你走》、《守業者》。就當麥包值得一個男一機會，當日黎耀祥都要有金牌監製添叔加持，今次可以避開「極膠」監製關永忠都算不幸中大幸。

TVB就算喺珊姐未插手戲劇組捧幾位契仔女之前，捧人一樣系親生仔女「老是常出現」，年年圍內頒獎禮就系「多謝樂小姐」。始終作為觀眾真系會悶，谷新人觀眾當然叫好。

好戲唔一定要「人望高處」擔正，而且從《大鬧廣昌隆》同《金裝四大才子》卡士就知，選角系講配搭、新鮮感、火花，而演技並非最重要。所以之前都幾期待《愛情食物鏈》，喺《學警狙擊》、《巾幗梟雄之義海豪情》演出合格嘅金剛配小儀，（雖然陳智燊同高LING極之趕客）可惜暫時無甚火花，頗悶。不過以上講緊嘅幾位，無論有無能力，都已經被力谷緊。仲唔快啲多謝TVB？！

文章來源: https://www.twgreatdaily.com/cat99/node880371

轉載請註明來源：今天頭條