油麻地彌敦道最近出現一間以「中西式 自助餐 驚嚇價 $58」吸客嘅茶餐廳。
油麻地呢個香港懷舊之地最近出現一間以前衛方法經營嘅茶餐廳，就係開設晚飯時段放題任食，每位只需$58，近日更被食客將此消息放上網，被網友瘋傳，到底係唔係真係其事呢? FACE Pop記者今日就去到現場直擊!
網上瘋傳呢間茶餐廳每位只需$58就可以任食2個鐘嘅消息。(網上圖片)
記者一到達餐廳門前，已見有數個寫上「中西式 自助餐 驚嚇價 $58」嘅牌，入到餐廳，格局同普通茶記其實冇乜大分別，不過全場坐無虛席，唔通$58放題任食真有其事?經記者求證，該餐廳喺每晚6點開始設有$58放題任食2時小時優惠。
無花無假，有網友食完再開po。(網上圖片)
FACE Pop今日搵到餐廳老闆劉欽界(左)及「奶茶王」葉達生(右)接受訪問。
大家可能會有疑問，$58任食2個鐘，食物質素一定差，不過根據記者觀察，現場有鹽焗雞、椒鹽豬排、魚香茄子及蒸魚等等，食物種類都頗多元化，不過份量相對較少，所以食物一出，好快便被食客搶曬；至於味道方面，雖然係$58任食，不過都絕不馬虎，具一般茶餐廳應有水準。
$58一位任食2小時確係吸引，不過$58蚊只包任食，唔包任飲，如要飲嘢，就必須以原價的半價購買，或選擇喺自助食物桌上嘅例湯，餐廳亦暫時未有甜品供應。雖然全場爆滿，如欲以$58任食2小時，更需要book位，不過就現場所見，食客全部以中/老年人或夫婦為主，年青人只佔很少數。
餐廳格局同普通茶餐廳冇分別。
任食係唔包飲品，如要飲嘢，就必須以原價的半價購買，不過加一都免又確抵。
在場嘅食客食得好開心，身為餐廳老闆的劉欽界接受FACE Pop訪問時表示，$58放題任食已開始咗近一個月:「(開始咗幾耐?)大概廿日啦，已經做咗20日左右。」但點諗到呢條橋呢，原來係老闆幕後軍師，有「奶茶王」之稱嘅葉達生獻嘅計:「我聘請咗『奶茶王』開頭幫我做奶茶宣傳嘅，跟住就做咗我嘅顧問，咁佢就推薦咁樣做($58蚊任食2小時)。」
真係58蚊一位，2位$116，無花無假。
之後「奶茶王」都有返餐廳接受訪問，佢同老闆都表示，喺未來嘅日子可能再會推出不同優惠，亦有計劃加設甜品提供俾食客選擇。而老闆話設有放題任食呢個原意，唔止係宣傳餐廳，更想俾人知道，「唔係話經濟唔好就冇嘢食，其實平都好食嘅。」
而大家最想關心嘅，一定係到底茶餐廳以咁低嘅價錢提供任食，會唔會蝕本，等老闆為各位解答:「薄利多銷，蝕本就未嘅。」仲因為「自助」呢個形式減低人手，幫餐廳節省開支:「我同佢(葉達生)就研究咗，咁樣做法(自助放題)我哋可以減低員工嘅人手成本。」
轉載請註明來源：今天頭條