正所謂「男人到左三十歲仲要依賴交通工具好可憐」，今日決定為自己添置一部座駕。徐徐步入車行，經紀馬上為我介紹一匹馬力十足的機車：「勁呀呢部！叫【Janice M. Vidal 衛蘭】，1982年中菲韓車廠聯合製造，2005年原廠出品，零件仲好update，引擎聲帶無雜音，正架。」

經紀佬呀，我想睇啲私家車喎……「機車太危險，皮包鐵。」其實我都無機車牌。「唏！講呢啲！呢架機車好肥架！橫掂今日咁凍，啲肥膏包實你，又暖又安全。」

咁好啦，橫掂唔趕時間，經紀佬就揸住呢部機車載住我兜幾個圈試車。「拿，放十首歌你聽，試下部機車音響。」

1. 離家出走（2006）

「豁出去漫遊，不通知親友，那快感少有，哪管想去多久……想當年我就係揸住呢架機車離家出走。」經紀佬忽然感慨，想起少男心事。

2. 大哥（2005）

「想當年呢架機車初初出道果陣，唔出樣，無樣睇架！得把聲聽到，但已經先聲奪人。」

3. 一場誤會（2005）

「呢隻歌果陣真係陪住唔少港女成長，【誤會你有心，日夜苦惱自尋，想得近，卻遠得過份】。嘩，十個女同學有九個張檯面都係刻住呢句野。」

4. 心亂如麻（2005）

「咦！我聽過喎呢首！」好熟口面，真係聽過。經紀佬激動嚎叫：「大佬！梗係啦！想當年灣仔東方188電腦鋪，或者旺中、銅鑼灣地帶，有邊間boutique 唔係播緊【My Love】呢隻碟？」又係喎，好似係商場鋪頭仔成日聽到。

5. 情深說話未曾講（2005）

「呢架機車第一手車主就係黎明，佢好豁達架，所以佢唔驚人地話佢唔豁達，叫人改隻jazz版【情深說話未曾講】比機車翻唱，拿，你有耳聽，唔差架。」

6. My Cookie Can（2008）

「想當年我當正呢部機車係我老婆黎架，你聽下，sweet到……」

7. 就算世界無童話（2008）

經紀佬忽然將機車停在路邊，大叫：「2016年還在聽【就算世界無童話】的揮手!!!」成街人都在揮手。

8. 陰天假期（2008）

「我個人最鍾意呢首啦。」改編伊藤由奈【Endless Story】「機車勝在副引擎把聲夠靚，唔差得過原唱。」

9. You go I go（2013）

「好新喎呢隻。」「係呀，佢仲有貨架！」

10. My Love My Fate（2005）

機車經紀：「好好聽，真係好好聽。」不停loop了4次也不肯讓我下車。

駕回車行，經紀立即說：「拿，後生仔，諗諗佢啦，部機車肥就肥啲，但好野黎架呢架。」未幾，即有幾名華納公司的高層趕至：「經紀，我要左呢架機車。」高層取出支票簿，捷足先登：「開個價黎。」手續辦妥後，華納高層駕車絕塵而去，留下一張字條：「衛蘭2016年復出。」不帶走一片雲彩。

轉載請註明來源：今天頭條