雖然今日下午市區氣溫只得3 °C，但睇佢兩個個甜樣都feel到warm!

46歲鄭嘉穎同24歲陳凱琳（Grace）去年拍大台劇《殭》撻著，五月驚爆父女戀後高調認愛。雖然有指陳凱琳嘅富爸爸提起嘉穎皺曬眉，不過仍無損二人感情，早前仲拖住手出席胡杏兒婚禮。

今日下午市區溫度只得3 °C，鄭嘉穎同陳凱琳首次以情侶檔姿態出席新春活動掘金。Grace台上台下不斷甜笑狂電男友，二人仲全程密密斟傾唔停，以行動證明乜嘢叫做打風都打唔甩。談到去年發展順利，Grace就話好感恩：「我覺得真係好幸運，入行之後有好多好多機會，我自己都好努力做到最好，成績都係唔錯，多謝大家支持，成日鼓勵我，令我成日都想拍好劇畀大家睇。」

俊男美女嘅愛情結晶應該會好打耳。

話到明打風都打唔甩，呢對冤氣情侶真係唔驚你盲全程曬恩愛，先係Grace出手餵嘉穎食糖蓮藕（即係甜甜蜜蜜、佳偏天成呀！）好閃呀？未夠……稍後佢哋應主持人要求用紅線綁手玩遊戲，二人更情不自禁拖到實，好閃呀？未夠……Grace仲幫嘉穎戴頸巾，圍上心型結，閃到盲未？

糖蓮藕＝甜甜蜜蜜、佳偏天成。

情不自禁拖手了。

留意番，陳凱琳接受訪問時無時無刻冧望男友，又話情侶檔出活動真係「好開心」。問到嘉穎會唔會多啲帶女友出嚟，佢就話：「我覺得又唔使嘅，偶然一次咁先珍貴啲，偶然間，適合啦。」不過經常傳出陳爸爸唔鍾意你喎……嘉穎即時話已經見過對方：「其實見過㗎喇，你哋唔好睇嗰啲雜誌咁寫啦。」Grace亦加把口：「佢媽咪好好傾，好friendly，同佢相處都好舒服。（二人又對望）（咁幾時結婚呀？）一步一步嚟，到時話你哋知啦，啱嘅時候啦，過咗新年先啦，大家開開心心過年。」問到二人點過情人節，嘉穎又搶答：「關你乜事啫，做乜要話曬俾你聽啫，哈哈哈，唔話你知呀，唔好咁八卦啦，一單還一單，我哋今日個活動講新年嘅，情人節先講情人節，你唔好理我啦。」

陳凱琳無時無刻冧望男友。

陳凱琳喺旁邊聽到掩面，怕羞豬呀(>(00)

轉載請註明來源：今天頭條