新版：

舊版：

12年前蔡育瑜同曾偉忠兩位足球評述員喺無綫直播體育節目送「足金X猴」甩碌事件，俾網民笑到今時今日。估唔到12年後嘅今日，送金猴事件再次重演，不過就由無綫搬咗去nowTV。事關佢兩位0依家幫nowTV講波，nowTV就食番12年前佢兩個送「足金X猴」呢件事，喺嚟緊猴年送金猴畀觀眾。 呢條送「足金金猴」嘅宣傳片，今日下晝擺咗喺nowTV嘅facebook專頁，片入面個布景同當年佢哋直播個景似到十足十，而一開始大哥瑜同曾偉忠攞住稿猛練習講「足金金猴、足金金猴」，跟住大哥瑜就話：「nowTV賀年送金猴有獎遊戲」，曾偉忠跟住就講出送金猴問題遊戲問題，就係2004年英超賽事狼隊主場對曼聯嘅賽事，邊位狼隊球員為球隊射入奠定勝利嘅一球，而呢題問題，正正係當年送金猴嘅問題。

跟住大哥瑜就笑笑口話:「答中嘅朋友有機會得到足！金！金！猴！」仲係重複咗兩次添，喺佢身邊嘅曾偉忠就口噏噏跟住大哥瑜講「足金金猴」，順利講完清楚送「足金金猴」之後，工作人員就玩紙炮慶祝，大哥瑜又同曾偉忠拍手互相激勵，甚至開心互攬，相當搞笑。 今次nowTV唔單止搵兩位當事人喺一個激似當年嘅布景面前再送3隻金猴，而且仲一樣係由六福送出，問嘅問題亦係同一條問題，nowTV更呼籲當年中咗獎嗰3位分別姓郭、姓羅同姓黃嘅觀眾再次參加添，真係相當抵死！

不過，為咗增加難度，nowTV今次加多咗條問題，就係覺得有邊個球星踢法似大哥瑜同曾偉忠，同埋講埋點解，又要求答法方面求要有創意。呢個送足金金猴截止日期係下個月3號，喺年廿八曼城對李斯特城嘅英超賽事入面，大哥瑜同曾偉忠就會再即場宣布得獎名單㗎喇！另外，參加者重要夠18歲，要like咗nowTV fb專頁，答嗰兩條問題同埋tag三個朋友，做齊呢三個步驟就合資格㗎啦。 話時話，今次條宣傳片係錄影，佢哋當然冇再蝦碌，但唔知到時佢哋再現場送金猴嗰陣，會唔會「歷史重演」？呢樣嘢真係好難講呢.....

轉載請註明來源：今天頭條