一場分獎典禮，搞到全城「洗版」，足證網媒《100毛》影響力幾咁大，大到左報都要撰文鬧呀！唔只樹大、毛大都會招風㗎，唔少毛毛好擔心，阿爺會出手壓抑「毛」風，例如搵支大水喉收購《100毛》，咁咪全面變5毛囉，點知呢個時候，有傳媒話李澤楷會投資《100毛》，即時又令到毛毛巧京京，但《100毛》「腦細」林日曦話現階段唔會賣，毛毛暫時可以放心嘞！

有周刊噚日報道，當日出席《毛記分獎禮》嘅前商台高層俞琤（YT），會過檔李澤楷（小小超）嘅Viu TV揸旗，仲拉線促成咗now轉播《毛記分獎禮》，兼小小超會大力支持《100毛》。

「分獎禮非俞琤促成」

一班毛孩梗係好關心，「黑面」見稱嘅《100毛》「腦細」林日曦，係咪丟低佢哋唔理？林日曦回應時話喎：「首先冇睇原文，啲報道大概quote出嚟嗰啲，對於我嚟講同老朋友WhatsApp一樣，乜知情人士據了解……首先YT係咪去Viu TV？我係唔知嘅，不過佢文中有啲毛記嘅嘢可以回應。now現場直播分獎禮係因為YT穿線係絕無其事，now係我直接打比Viu TV總經理魯庭暉先生，因為我之前商台識佢。」

問到Viu TV有冇經YT聯絡佢，話想投資《100毛》呢？林日曦斷言：「冇。」咁會唔會賣先？佢話：「現階段唔會，除非我唔使做，畀嚿錢我開另外一間。」八方都問過nowTV，發言人否認小小超會買《100毛》，似乎未識欣賞「一戴一露」。

文章來源: https://www.twgreatdaily.com/cat99/node858412

轉載請註明來源：今天頭條