記得上年參加中學同學嘅婚禮，一貫傳統幾十圍嗰種。由於同台男士比較多，大家又識咗十幾年，坐位咁啱又夠偏僻。所以傾傾下話題開始轉去品評新娘伴娘仲有咁多位姐妹嘅質素（有女士都加入一齊討論的…）

飲到一半嚟到中場娛賓表演，當時我地其實係無任何期望。直至見到大台開始準備樂器，嗰位大家一致認為「一般啦」嘅斯文型伴娘上台接過枝吉他，嗰刻大家都疑惑起嚟，同台某位老同學仲信心滿滿咁講：「佢應該係做司儀負責開場白啫。」

但佢錯了。事實係，著住禮服嘅伴娘熟練咁握住佢枝私伙吉他，擺好姿勢，同後面幾位樂手打咗個眼息之後。琴聲先起，接住吉他聲入，充當吉他手暨主音嘅佢就喺全場人面前表演咗一首 Beyond 嘅《海闊天空》（當時未膠化的）。

雖然吉他技巧未算技驚四座，但金口一開無疑係一嗚驚人。令在旁所有男士都不禁瞠目結舌。唱完今天我，緊接住就係《情人》同《喜歡你》（當時689未同黃家強合唱的）。事後聽返，原來伴娘本身都係夾開 Band，因為新郎新娘都係 Beyond fans，所以專登苦練，喺呢個大喜日子為佢地送上呢幾首歌。實在係有心，而且證明人真係唔可以貌相。

完場時歡呼聲四起，雖然睇得出老一輩並唔係全部接受到呢種表演。但斯文型伴娘嘅表現，肯肯定吸引到唔少現場嘅年青男士。猶記得表演完嗰刻，坐我旁邊嗰位老同學甚至忍唔住即刻衝過去抄佢牌，話唔想錯過呢次機會認識佢。

識玩音樂嘅女仔無疑係非常吸引，相信喺到唔洗再多講。而呢種吸引力，好大程度係來自正面嘅「反差感」。因為本身無預期過，出嚟嘅感覺先更加強烈。

就好似燒烤識起火嘅女仔、完全唔驚仲可以一掌打死小強嘅女仔、表面粗心實質好細心整得一手好嘢食嘅女仔、去旅行認路搭地鐵仲叻過男人嘅女仔…其實好多細微嘅位置往往都可以表現出呢種「反差」嘅吸引力。

當然啦，唔單止女人，其實男人都係一樣。

又舉個例子。好多年前一次行山經過溪澗，我地發現到有隻貓仔被困喺澗中間。當時大部份人都怕危險或者整濕所以唔敢去救。最後由嗰陣大家都公認係毒男嘅明仔主動出手，輕鬆就將隻貓仔救返嚟，此舉令到好多同學都對佢改觀。多年後，當年嘅毒男明經已搖身一變成為而家嘅偽毒明。問我佢有冇女友？哈，當然…

…仲未有啦。

咳咳…其實講到尾都係想指出。無論係男係女，即使外表仲有package比唔上人，但內在都必定有值得人欣賞嘅吸引力，只係等緊一個時機表現出嚟。遇到嘅時候，千祈唔好放過機會啦。

文章來源: https://www.twgreatdaily.com/cat99/node845333

轉載請註明來源：今天頭條