每次食完爭鮮，都好似經歷完生離死別，高低浮沉。

迴轉壽司是命運的大輪盤，因緣而際會，是沒有主體的輪迴。茫茫然身陷其中，本我的不理智、飢餓感，喚起雜食的慾望，徬徨卻又無力。我在單人座位坐下。環視四周，都是幾位單丁客人。也許這裡是毒男隔離部，或是浪子放逐區？我不清楚，亦無力深究，氣定神閒的置放杯碟，打開82年的免費綠茶包，泡製出上等茶銘，為孤獨糅滲一份休憩。

我視爭鮮為人生試煉場，它將人類心理與人性，在壽司面前表露無遺，生勾勾，赤裸裸。我餓不堪言，雙手已蠢蠢欲動想搜括百碟，誓要把天地吞，但理智告訴我：一碟要8蚊，仲未計加一。雖然好好好好想食嘢，但都必須要揀最好食、最靚、最新鮮，免得浪費金錢。

我用聰明嘅頭腦，配以凌厲眼神，一眼關七，留意住邊碟最合符成本效益，當中要估算碟盤面積、大米進口地、形狀分布（唔係橢圓形我唔食）、分析刺身同飯嘅黃金比例等等，工序繁複，但心懷盼望，務求選出我最喜愛的壽司。

第一碟唔新鮮，OUT；第二碟擺放角度唔靚，OUT；第三碟刺身條紋不對稱，OUT……

如是者，望住一碟又一碟有靈性嘅壽司被運走，我好唔開心。我哋總係以為最好嘅嘢係後面，一直等緊最好嘅出現，但係，錯過咗，就係錯過咗，或者有人會話，更好嘅係前面？錯！呢個世界冇得返轉頭，最好嘅已經出現過，你嫌第一碟舊魚太細，結果第二碟連舊魚都冇埋，我哋都好天真咁覺得下碟會多舊魚多舊魚，原來其實係自己「多舊餘」。曾經觸手可及，但唔識好好珍惜，係眼前溜走，貪求好味只因癡，一切眼淚思憶，都係徒然嘅。

既然有感覺，點解仲要等呢？錯過咗，隨時俾其他人拎走，冇得怨。或者輪完大米後，你哋仲有緣再相見，但都已經未必係本來模樣了。

彈指間，內心有把聲音安慰我，叫我化被動為主動，孫子兵法有云：「善攻者動於九天之上」。無錯，我應該要將目光放遠。

於是我放眼望四方，赫見前三個身位，有個位唏噓男子，獨自進食。佢一見到三文魚壽司就拎，果碟生勾勾啱啱先游出公海，旋即被奪，就好似葉鴻輝咁，用心守住每一球，大大話話飛身掃咗十幾二十碟。我暗暗讚嘆，心底封佢做三文魚殺手（samanyu hunter），差啲想上前求佢收我做弟子。佢能夠將最好最鮮嘅，都據為己有，呢一刻我終於明白，點解輸送帶去到我度時，每碟壽司都係屎。呢個世界公平咩？呢個世界公平咩？我唔係冇試過，我試過安份守己，日等夜等只係等緊一碟好嘅刺身，用自己雙手去爭取，而佢只係早我少少入座，就可以坐個好位，早到早享受，佢根本冇諗過排佢後面嘅感受，話知我哋死。到底有咩本事，可以剝奪同控制我應得嘅資源？

冇啊，就係因為佢早入座，為咗滿足自己口腹之慾，妄顧一眾食客權利，呢個世界公平咩？

我按奈滿腔怒憤，打算絕食，用愛與和平感化佢。我係廢青，我冇用。我意識到，自己係愛情同社會嘅失敗者，一無所有。望住空無一碟嘅台面，我知道我係成功嘅，雖然肝腸寸斷，但未敢忘記國仇家恨，日本人侵掠我哋三年零八個月，雞犬不寧，切膚之痛猶未雪，又豈會做漢奸幫襯佢哋？我餓不食日粟，於是嚐盡免費豉油，索盡佢地嘅冷氣，大肆吸風飲露，竭盡倭寇資源，正是壯志飢餐胡虜肉，笑談渴飲匈奴血，痛快！痛快！

突然，一位妙齡女郎依偎身旁，挨在耳邊，輕聲細語，我知道，又將有位受害者迷倒在我的手心中。

「先生夠鐘喇」，南柯驚醒，回過神來，發現原來一碟都冇食過，或者我真係夠鐘……夠鐘食藥。望住迴旋帶上嘅壽司，燈光折射穿透薄如紙的魚生，我望唔透，到底我哋嘅將來係點？到底生命中幾時會出現一舊靚嘅三文魚？

運輸帶徐徐前進，將密麻麻嘅無主孤魂，碰撞堆疊，壽司們肩摩轂擊；我哋同樣喺呢個大輪盤上，順流而走，徘徘徊徊，宛如一舊肉鬆壽司，於社會洪流被擠走，亦無人問津。

「先生真係夠鐘喇」，催促聲很刺耳，也許確實夠鐘食藥了，俺掏出精神病藥丸子，晃晃桌上那杯82年極品綠茶，一服而下，我開始懷疑刺身也是82年，開始懷疑人生、懷疑孤獨。

如果82年，是個好年份；爭鮮，的確好唔新鮮。

轉載請註明來源：今天頭條