何傲兒暗指前度周子揚花心。

潛水一排嘅何傲兒今日同黃智雯出席公開活動。

日前被前度周子揚大爆全家苛索無度嘅何傲兒(Lily)，自爆出新聞後一直潛水，今日佢同黃智雯出席公開活動，喺台上寫揮春、種蘭花提早同觀眾賀年，仲自爆迎一年好想搵到新歡：「希望大家新年都可以行個大運，我自己就希望快啲有個真命天子出現啦。」

兩位都好靚女。

台上笑面迎人，不過Lily接受訪問時就阿愁上身，有記者問到佢擇偶有乜條件，佢面色一沉咁話：「我覺得……（係咪要有錢㗎？）我覺得一個普通女仔，我嘅擇偶條件都係離唔開真誠同善良、同埋專一。」之後更主動提起前度周子揚：「喺呢件事上面（周子揚爆料事件），我都有啲嘢想講，就係確實唔係幾開心，因為我覺得一直有好多唔係事實嘅嘢，我一直都係覺得無需要去澄清，因為唔係真，但係由聖誕到依家，我一直都只係發過一個聲明，中間真係諗住『由佢啦』，唔想件事發到咁大。但係呢個人愈講愈過分嘅時候，我覺得我有責任去捍衛番我屋企人嘅尊嚴，所以我係決定，已經同家姐一齊出咗封律師信畀佢，我相信佢已經收到喇。其實已經寄咗幾日，我相信佢已經收到喇，（幾時寄？）上禮拜尾。我真係唔知佢幾時講真、幾時講假。其實我同佢九月開始已經冇聯絡，所以都唔知點解會咁樣，呢件事最唔開心係……影響到我全家，我係最唔舒服，同埋搞成咁樣，自己嚟講都真係幾唔舒服。」

何傲兒透露已經寄咗律師信畀周子揚。

Lily坦言二人曾拍拖一段時間，又話唔認戀情係有原因：「當我唔去承認一段感情嘅時候，係去靜心觀察緊，到底呢段關係應唔應該繼續落去。但係好感謝呢件事件上……我想講嘅係，多謝林生同埋佢一家人，一直俾咗好多精神上嘅support我，我講一百次，你哋信又好、唔信又好，林生同我只不過係工作上面，上司同下屬嘅關係，就唔係你哋諗嗰樣嘢。」

談到分手原因，Lily就話：「我自己係天主教徒，有好多嘢我會keep住我嘅人生、都會守住好多嘢。（守身如玉？）你哋自己諗啦。（你暗示因為性而分開？）分開嘅原因，我自己個人就好專一，分開嘅原因，周生係最清楚。（係錢銀上嘅嘢？）呢啲唔係事實嘅嘢，我已經交畀律師處理，其實都話咗唔係真，我都唔知點解要回應，話嗰啲幾百萬……如果我真係收咗，我做嘢就唔使咁辛苦啦係咪，同埋嗰個鑽石，係贊助嚟嘅，有曬根有曬據，好多人都知囉，我基本上係冇收過。」

轉載請註明來源：今天頭條