瘟仔功　除夕甜餵雪糕　新姣精李佳芯咀爆 now奀星陳炳銓

男友陳炳銓原本玩緊手機，突然想咀女友，李佳芯都冇視察下環境就咀落男友度。上位花旦有邊個夠膽真性情？李佳芯抵讚！

真面目瘟仔功除夕甜餵雪糕新姣精李佳芯咀爆 now奀星陳炳銓

有線黨喺大台呼風換雨，其中李佳芯上位速度勁快，憑《學是學非》成為宅男女神，又有機會喺新劇《律政強人》做女一，照計下一步應該搵個當紅小生或富二代拍拖先配合劇情。

估唔到女神表面係姣精，原來內裏好 pure。除夕夜同 nowTV奀星男友陳炳銓 Danny拍拖，二人情到濃時更當街咀爆，之後再到赤柱浪漫散步。難得上位花旦有真性情，冇鮮花鑽戒都一樣好浪漫啫！

32歲李佳芯，原名李嘉馨， 11年由有線過檔大台，做《學是學非》主持上位，宅男嗒糖封佢做女神， 14年喺劇集《名門暗戰》姣黃浩然同岳華而被封新一代姣精；連新劇《律政強人》仲做埋女一，拍住方中信做律師。

李佳芯拍完劇，即約男友到附近拍拖，二人到濟公廟附近亙影，李佳芯仲鋪上自己 instagram，當然男友冇曝光啦！網上圖片

一人一啖二人去到赤柱冇去酒吧蒲，只係買杯雪糕你一啖我一啖，冧到死！赤柱漫步

喺大台上位咁快，諗住佢步陳凱琳後塵，必揀大紅小生或者富二代，原來女神仲好 pure，竟然揀個 now《山步行》節目主持陳炳銓 Danny做男友。據知二人都係因為行山認識而撻著，上週四除夕浪漫大日子，李佳芯拍完《律政強人》外景，即心急會男友，二人先到濟公廟行街。雖然李佳芯現為上位花旦，但唔會戴口罩或黑超扮明星，同男友拍拖亦好大方，期間男友主動索吻，李佳芯亦唔避忌當街照咀。

男友喺 now仲捱緊，李佳芯亦識做，只同男友叫漢堡包醫肚，之後再到赤柱漫步，二人坐在附近公園食雪糕，李佳芯更主動餵男友食。上位花旦都肯同你赤柱周街坐，呢啲姐仔真係絕種啦！

除夕夜二人到赤柱拖手仔，使費零蚊但夠浪漫。

喺上環接完女友，陳炳銓再同李佳芯買外賣，二人喺車上麵食嘢，之後再到赤柱拍拖。

男友除咗做柴可夫，仲幫李佳芯攞手袋，感覺上叫體貼，唔似觀音兵。

李佳芯男友陳炳銓，未必多人識，不過行山友一定知邊個，佢係 now《山步行》主持，跑過男極又會帶團行山，風格幽默，可能又會被大台撬走。

除夕中午李佳芯都要開工，係新劇《律政強人》做女一，幾乎場場戲做方中信對手。巴打爆 Ali愛溝仔

李佳芯未入有線前做過模特兒，讀過城大副學士，雖然被高登仔讚佢人靚係女神，不過有自稱 Ali同學曾爆料話佢讀書時出名愛溝有錢仔，絕對唔係表面咁清純喎！不過全部都係純文字討論，冇圖囉！

李佳芯原名李嘉馨，最初做模特時英文名係 Alice，咁當然依家叫 Ali好聽啲啦，冇咁普通囉！（網上圖片）

李佳芯前度係蔣嘉旻現任男友 DJ Martin。《蘋果日報》圖片