結婚係人生大事，喺香港由準備婚禮一刻就已經要精打細算，搵邊間婚紗店都要諗清諗楚。一間香港婚紗店Facebook專頁就喺日前上載大量客人對話，力數對方不是，而客人又有另一個版本。
到底呢場婚紗羅生門，誰是誰非呢？
呢間婚紗店WGallery，就上載咗一系列相片，話因為一個港女準新娘，喺Blog上面唱衰佢地。事源係WGallery喺2014年，港女客人K幫襯佢地一個新娘化妝加租衫package，本來K試完第二日仲大讚服務好，仲同化妝師由客戶成為朋友，私下交換聯絡方法。
原來港女客人K成為咗一個關於新婚生活嘅社交平台，仲做咗Blogger，K想寫啲咗題材俾Blog，所以當WGallery有新裙時，就會即時去Book裙，影相去試裙。店家指，基本上都會滿足佢嘅願望，會俾返曬所有試裙相俾佢，無形中好似變成一種特權。
事件本身喺港女客人K決定撻訂後告一段落，不過店鋪近日就發現K喺佢嘅Blog入面，表示WGallery服務非常不滿，話佢想拎返啲試裙相都有難度，又話「氣氛好差...方丈個人好唔nice...」除咗呢篇文章之外，喺近期一篇Blog入面，港女客人K講到自己揀化妝師（MUA，makeup artist），講咗三個化妝師，再次彈WGallery化妝師嘅技術唔好，又話化妝師嘅態度唔好，仲要Highlight話佢地唔推薦呢間婚紗店。
WGallery見網上被抹黑，就將所有Facebook同whatsapp嘅對話內容，以示公正。內容所見，其實K喺入面都不時讚WGallery嘅服務好，又話會介紹俾朋友。而WGallery喺Facebook對話入面都講明K咁樣轉款同Hold裙都係一種「特權」，對話內容，明顯同Blog嘅內容有出入。
Facebook Post中有唔少人支持店舖，但亦有唔少人批評返WGallery將客人嘅個人資料，例如係小學老師等資料放出嚟公審，侵犯隱私。WGallery最新回應係，已經諮詢法律意見，唔會再對事件做任何回應。而港女客人K近期仍然有更新Blog同Facebook，佢唯一嘅回應，就只係話
「終於吐番口冤氣 好多謝願意幫我嘅各位，呢幾日受左太多委屈，公道自在人心呢句說話應該係我講!!」
店家公審原文:
《慎入！繼媽媽網後，本店也被屈中招，各位行家千萬小心！》
本店在2014年遇上一位客人，佢幫襯咗我哋新娘化妝＋租衫package，無論試妝和試衫過程都相處好融洽，join package翌日仲send inbox 來多謝我哋嘅專業服務，讚賞不已。因為咁，佢仲主動要求化妝師私下交換contact，包括whatsapp和個人FB，令本店化妝師視她為好友，估唔到惡夢就咁樣開始......
其後，呢位客人向我哋表示，佢成為咗ESDLIFE WOW 嘅blogger，每次我哋返新款，佢都即刻預約試身，除咗一d新款外，佢仲要求試上一d佢唔打算租嘅款式。原來，佢話想以呢個blogger身分多d寫blog，要多d題材，擺多d相吸引多d人睇。經過多次滿足佢呢個要求後，我哋商量過覺得就此「任試」落去唔係辦法。因為佢不斷試又不斷hold裙（但一直唔confirm)，令到其他客人可揀嘅款減少，我哋唔想對其他客人不公平，所以客氣地要求佢可以先定款，並只需要分享自己嘅部分，揀選自己嘅裙款就ok，毋須再於blog度放其他「不會考慮」嘅裙相。點知，佢得唔到呢個「特權」後，我哋後知後覺，突然有日發現佢喺佢個blog度將事情始末寫到偏離事實，仲話我哋一直唔俾番d衫相佢（其實我地前後不下3次send番「所有」衫相俾佢，有email record作證），仲不斷pm其他blog友叫佢地唔好幫襯我地，似乎暗示我哋係一家黑店。佢咁做，完全抹殺咗我地呢一年幾以來一直對佢嘅真心款待。
我地明白到客人多從婚網查閱資訊好方便，又習慣睇blogger嘅用家分享，無疑係大勢所趨。但呢d婚網分享平台，係完全唔保障商家。就此事我哋曾經聯絡過ESDLIFE WOW，指明有會員作出不實陳述，並有機會涉及惡意中傷及誹謗行為，嚴重損害本店聲譽及運作。無論我地提供幾多雙方對話內容的文字及圖片資料作證，證明對方所講唔係事實，但ESDLIFE WOW只作簡單的罐頭式電郵回覆，話佢地一直支持「言論自由」，所以唔會要求會員隱藏或刪除相關內容。最搞笑係，打去佢地個「聯絡我們」熱線，對方話呢個熱線只作預約「檢查身體」之用。要知道網上嘅內容係永久存在，更何況係不實內容？呢類網站鼓吹有利益就讚好，濫用言論自由作賣點嘅經營手法，我地實在不敢苟同。曾經聽到有位行家同我地講過，遭客人在婚網上惡意中傷後，都要俾萬幾蚊成為「優質商戶」後先可以刪到相關內容。
其實，結婚係開心事，就算太早join 咗package而事後因搵到更好選擇而後悔，甚至決定撻訂，我地亦覺得可以理解。但呢位新娘子咁隨意因個人喜惡，得唔到益處就不滿，然後肆意中傷我地，令我地呢d辛苦經營近10年，一直咬緊牙關嘅小商戶蒙受重大傷害（單單pm嘅訊息為數很多，部分仲要係原本想幫襯我地嘅blog友），唯一目的就係想我地無法繼續經營，斷人米路嘅做法同心態，真係好恐怖，而我地更知道呢位客人係做小學教師，感覺就更加心寒。作為小商戶，我地仲有乜可以做到？一句「言論自由」就可以成為擋箭牌。今次喺呢度咁史無前例咁詳細交代番呢件事，就係想各位行家以後多加註意，我地唔想再有其他行家無辜中招，蒙受不必要嘅損失。
p.s. 上載了呢位客人自join package後，呢年幾來同我地一直嘅聯繫。如果佢話自己在blog所講嘅都係「真實分享」，話join package嘅第一天就唔鍾意我地嘅化妝服務，又話我地服務態度差，咁佢又點會喺之後咁多次不斷想搵我地化妝師幫佢同佢屋企人化妝？我地唔介意公開呢件事，就係相信公道自在人心，就由各位行家及網友自行客觀判斷吧！
轉載請註明來源：今天頭條