「聽講珠江新城有間德國餐廳唔錯，不如我哋去試嚇吖？」阿強問，果時佢同Mary仲系普通朋友關係。
「好呀。」Mary微笑住應承。
「7點半好無？如果OK我就即刻打去訂位啦，我驚多人要排隊。」
「好呀無問題。」
追女仔嘅嘢，主動細心當然最緊要，平時多啲留意Target鍾意食咩，有咩興趣，然後投其所好，約嚇食飯睇嚇戲，如果可以一齊運動或者一齊進修咁就更佳啦。相處多咗，慢慢就會開始熟落，戒心亦會放低，耐唔耐再送上一啲小驚喜同小禮物，定必可以搏得紅顏一笑。
如果連輕微嘅身體接觸都無反抗，咁成功機率應該都幾高，就可以進一步嘗試送佢返屋企。不過其實以上呢段都系廢話，計我話有feel大過天，無feel，我理得你系李﹢×個仔啦！雖然阿強唔系咩富二代，亦無送過名牌手袋俾Mary，但佢同Mary亦發展得好順利，所以約會咗幾次就成為咗男女朋友。
「今年我生日食咩好呀？」Mary問，呢個系佢第二年同阿強一齊過生日。
「唔知呀，是但啦，搵嘢食你叻啲，平時都系你諗架啦。」阿強話，然後繼續玩手機睇『金句王』。
「其實呢啲無話叻唔叻，我都系上點評搵，平時我諗唔緊要，但系可唔可以唔好我生日都系我諗？」Mary有啲嬲嬲地。
「咁我都唔知你想食咩。」阿強話，男人對唔想做嘅事總會諗到無數個藉口。
「算啦，食果間xxx啦，聽講啲扒都OK。」Mary話，其實佢唔系要食咩五星級酒店自助餐或者高級日本料理，佢只系想食一間由阿強親自選嘅餐廳。
「你book咗位未？」Mary問。
「未呀。」阿強話，並且心諗仲有兩日先到Mary生日，聽日book都唔遲啦。
「你仲唔book？唔訂定先好難搵位架呢間餐廳，你唔諗同我食咩都算，可唔可以唔好我講埋想食咩你都唔去book位？」
「呢排做嘢忙吖嘛。」阿強話，佢唔知道，忙其實系一個令人非常之乞人憎嘅藉口。
「咁我諗你真系好忙，忙到連打一個電話嘅時間都無。」Mary講完，就頭都唔回咁走咗。
拍拖前系寶，拍拖後系草，Mary當然知道！朋友當初都勸佢唔好咁就令阿強得手，這樣佢唔會珍惜，但Mary覺得鍾意就鍾意，點解要扮到愛理不理？果啲咩微信時要回復慢一啲、點字數要少一啲嘅小把戲，佢覺得簡直系無聊到極，所以佢最後仲系順住自己心意去做。
其實二人相處耐咗，好多事都已成習慣，感情亦越來越穩定，進入老夫老妻階段，唔通仲日日要有驚喜咩？當然無可能，但只系特別日子做返少少嘢應該都唔系咁難啩？可能你會話要慳錢嘛，唔系點娶你啫？
心思其實唔使好多錢，收到一張手畫嘅卡分分鐘系開心過收到一條貴價鏈，「我唔識畫畫」、「手工嘅嘢呢啲我識條春咩」，嘥氣啦，講埋曬啲咁嘅藉口，一個字講曬：懶。你問心，如果未一齊，你知道心儀嘅人最鍾意手工嘢，你會唔會親自落手落腳去整？！
「今個星期日不如去睇xxx，我早啲出去買飛。」阿強話。
「嘩，轉性呀你？」Mary話，並且心諗呢條佬終於肯做返啲嘢。
「嘻，我仲book咗我哋第一次約會嘅德國餐廳，系咪好surprise呢？」阿強得戚咁話。
「你而家講埋出嚟咪唔surprise咯傻佬。」Mary話，而且忍唔住甜笑，其實女人有時真系好鬼易氹。
無論系熱戀期或老夫老妻嘅階段，耐唔耐為對方花啲心思系好應該。因為維繫一段感情從來都唔簡單唔容易，有時有啲嘢真系唔懶得架！
轉載請註明來源：今天頭條