12月28日，全城最矚目的當然就係藝人胡杏兒同圈外男友李乘德(Philip Lee)結婚一事，真係羨煞旁人！靚靚新娘子杏兒昨日喺多個埸合都有唔同打扮，當然全部都係勁靚啦！即刻為你介紹。

昨日早上新郎哥Phil著住中式唐裝去杏兒屋企接新娘，之後就同著住華麗裙褂的杏兒甜蜜現身。據知杏兒身上的裙褂價值二十多萬，係全手工3D立體龍鳳刺繡，由一名老內地師傅一針一線、費時12個月製作而成。因為價值不菲、手工繁瑣，係極少數尊貴人士的象徵。

杏兒結婚前一晚已經喺網上大曬自己當日會著的鞋，原來係英國品牌Sophia Webster出品的「Bridal Collection」，呢個婚嫁系列一共有8款高踭鞋，杏兒所買的一對名為「CoCo Crystal」，官網售價為395英鎊(約4,600港元)。鞋身以冰藍色為主，配上鑲有Satin閃石的鞋踭，高貴又大方。同系列其他款式一樣，都印有「Wifey For Lifey」字樣。

此鞋款於今年3月正式發售，不過由於大受歡迎所以基本上已經斷曬貨，但錫爆老婆的Phil尋遍全球終於搵到，難怪杏兒都要影上網曬命啦！

杏兒無論係同Phil行禮定係婚宴進場，當然都要著上自家店舖Kevolie出品、由設計師Kev Yiu親自操刀的白色婚紗。低胸婚紗的上身有一層薄薄的喱士，裙擺則是像魚尾狀，突顯美麗線條。

杏兒昨日全日的衣著都係以高貴大方為主，未見有性感大突破，俾佢展露身材。不過原來好戲在後頭，杏兒喺夜晚的婚宴上換掉婚紗， 著上一件金色超Deep V晚裝，大曬激深事業線，相當噴血！

另外杏兒又換上一件火紅色露肩晚裝，據知裙上有近三萬粒水晶，閃爆全場！而仔細睇更見到手同腰間都係隱隱約約的透視，低調地性感！呢件晚裝來自「The Blessing Collection」，同樣係設計師Kev Yiu親自操刀。

昨晚婚宴過後，杏兒同Phil去到中環夜店Bungalow開婚禮after party。杏兒身穿火紅色晚裝、頭戴小皇冠，成個皇后咁款！而且件衫仲內有乾坤，杏兒郁動雙手期間，隱約露出內裏的誘人喱士袖，簡約得來不失性感！

轉載請註明來源：今天頭條