大台一向俾人感覺封閉，保守，冇創意，要節目搞搞新意思，都要加入新思維，今晚佢哋會推出個節目叫《網絡挑機》，請咗一班youtuber好似司徒夾帶、Ming仔、Eminleo、Ronnie、Miss Hunny、伍公子等等上去，表面上話俾佢哋自由拍片向主流媒體「挑機」提出不滿，聽落已經十萬個不可思議啦!

好喇，今日節目都未出，已經不斷有參與當中嘅Youtuber爆料，「伍公子」就喺節目寸阿姐（汪明荃）唱歌好X難聽，點知佢就話TVB成段剪走曬，叫人唔好睇TVB喎。

剛才Eminleo又繼續爆，因為有人問佢點解要上TVB節目，佢就話:

「有人問我拍TVB為乜，我答緊係為錢啦！我哋收咗大拿拿3萬6蚊，拍左兩條成本起碼要10萬蚊嘅片。我自己都貼咗幾千蚊比人整後期，連車馬費都無得賺！正！喂，有下集記得預我呀，破產指日可待！」咁TVB又冇迫佢拍10萬蚊嘅片，破產又關TVB咩事呢?

之後佢仲爆大鑊話:「PS. 話說TVB約左公子去Big boys Club做訪問，點知公子訓(瞓)過龍，決定放飛機...TVB打N個追魂call比佢，佢都唔接。

最後方丈出咗追殺令，佢以後都唔洗上電視，係威嘅。」咁佢因為瞓過龍而失場，又好明顯唔關TVB事喎...............

TVB以前一班藝人簽死曬長約，又一台獨大冇其他路行，藝人當然唔敢講真話啦，o依家請一班youtuber上去，佢哋又點會賣TVB嘅帳呢?不過無啦啦喺個節目就嚟播出嘅日子就同TVB嘅編導岑應隔空互轟，真係要夾定都冇咁夾，令人懷疑係咪搞宣傳咋.....

轉載請註明來源：今天頭條