依件係我既親身經歷既怪事，佢發生係1987年至1990年依四年之間，

我同老婆原先住係觀塘雞寮既舊公屋，（即而家既翠屏道村），

因政府要改建全個村要拆哂全部七層大廈，所以我地可以用屋換屋既優惠，

去揀新落成既居屋。

當年嘅雞寮七層大廈

果年黃大仙區有個新居屋剛落成，我地見佢背靠獅子山，

面向香港島，座北向南，環境又幾清靜，所以就選左佢。

係揀樓果時，我見到某座有個單位係８樓８號室，個諧音發發都幾老黎，

於是就撲鎚買左佢，點知惡夢就開始勒。

依個單位既間隔係一入門囗，前面見到兩間眼鏡房，右面係廁所，

再隔離係廚房，廚房入面右手邊有一個小露台，大約４呎ｘ４呎咁上下啦，

大多數人都用黎放洗衣機，我地都係一樣，所以出面都幾迫。

初初搬入去果幾個月冇乜野，但之後就有事發生啦...

某個星期六，我唔洗返工，我係廚房預備緊午飯，當時大約上晝十一點幾到，

忽然我感覺有一個同我高度既黑影，企係我後面望住我，當我拎轉頭睇下果時，

個黑影就閃左去露台，我心有Ｄ發毛，我岩岩楂把刀切緊野，就楂住把刀企係度，

向露台大聲喝問邊個係出面，但冇人應，我就戰戰競競望入露台，出面一個人都冇。

之後又過咗兩個月，有一晚當我瞓到大約深夜三點鐘，突然感覺雙腳有D麻㾝，

由腳底慢慢伸延至頭頂，跟住全身郁唔到，個心好驚，想叫醒我老婆，但個口又打唔開，

個頭好似被人用手臂Cool實，壓迫得好辛苦，同時聽到一D好似收音機收得唔清嘅沙沙聲。

雖然全身郁唔到，但對眼可以睜得開，就望下間房有乜野啦，當時間房黑麻麻只係見到

冷氣機個開關掣，果盞紅色小燈。後來過咗十五分鐘，D麻㾝感覺由右邊手開始，

慢慢向左面方向減退，恢復活動能力之後，全身都出哂汗，搞到個人好累，

第二朝問老婆尋晚瞓得好唔好？佢話一覺瞓到大天光唔之幾好瞓添，仲同我講仲乜問佢瞓成點，

我驚嚇親佢，緊係唔講我俾鬼壓果件事啦。

又過咗一個星期，果一晚好夜瞓唔著，成晚眼光光，而我老婆已經瞓著咗，我心諗今晚會唔會又俾鬼壓，

點知即刻就黎料，果種麻㾝感覺同上次一樣，由下至上漫延至全身，心諗有冇咁靈呀，

由唔郁得到手腳恢復番活動能力，都俾佢搞咗十幾分鐘。後來我聴人講，如果瞓覺時係打側瞓，

就唔會俾鬼壓，因先前我係仰睡，所以就試下，又掂噃，到而家我已習慣打側瞓，以防有野黎搞我。

之後我晚晚發惡夢，搞到瞓得唔好，後來有個親戚知道咗，就叫我去沙田萬佛寺，

買一串已開光及用木做嘅大佛珠，將佢放喺床頭就唔會發惡夢，咁我就照做啦，

唔到你唔信真係冇再發夢。我問佢點知道有依様野呀？佢就話係佢朋友話俾佢聽，

話佢個女喺外國讀書，有一日個女打電話返黎，話佢租住果間屋有鬼, 每睌都俾野搞醒，醒咗睇到有個黑影企喺佢床尾，仲拉佢張被添。佢朋友就去問人點解決，

有人就教佢買條佛珠寄俾佢個女，話可以保護佢，佢就照做。冇幾耐佢個女打電話返黎，

話條佛珠已捉咗隻鬼，佢阿媽叫佢詳細講俾佢聽點情形，個女話當晩放咗串佛珠喺床頭，

當瞓到半夜，個黑影又再出現，突然有D光由果串佛珠發出，跟住個黑影就俾串佛珠吸咗入去，

仲話已經冇野搞佢咁話。

(Part 2)

又過左幾個月，我地安靜既生活又再起波瀾。有一日老婆同我講，話個肚成日隱隱作痛，好唔舒服，

我就陪左佢去睇醫生，經過檢查及用超聲波照過，醫生發現佢右邊卵巢，生左個大約ＢＢ拳頭大小既腫瘤，

我倆公婆聽到之後當堂呆哂，就問醫生個腫瘤係惡性定係良性，佢話要施手術割出黎檢查先知，

我老婆平時身體都算幾好，心諗係唔係果隻野搞我唔到，而轉移害我老婆呢？好彩個腫瘤經化驗後確認為良性，

我地先放下心頭大石。之後醫生叫我地早Ｄ生番個ＢＢ，怕另一個卵巢一旦有事，就冇機會生啦。

過左一年，我地個ＢＢ女出左世，因我倆個日頭要返工，所以就將佢交俾我媽咪照護，到星期六先帶佢返屋企。

因驚有野再搞我地三個人，我就買左一個風鈴掛係大門度，聽人講風鈴可以驅邪同驅鬼...。

有一晚我地係屋企傾緊計果時，突然老婆無端端心口作悶，跟住嘔吐不止，我就即刻帶佢去急症室，後來仲嚴重到要即時入院，經醫生檢查後又搵唔到原因，最後仲要係醫院住足一個星期添，

出院後佢又患上甲狀線過高症，成日手震同好累，行幾步就要坐低休息，搞到身體日慚轉差。

幸好，我公司有個同事得悉我既遭遇，就介紹一個好有名既風水師傳俾我。

某一日，果個風水師傅黎到我屋企，睇哂全間屋之後對我講，依間屋唔係太好，如有能力最好搬走，

我話依間居屋有十年禁售期，唔係話搬就搬，我仲同佢講，我已掛左個風鈴係門口，應該冇事掛？

點知佢聴到之後就噴到我一面屁。佢話風鈴雖然係黎擋殺，但外來殺氣因你同佢鬥，會增強佢既威力再攻擊你，所以你老婆就食正咗，唔病都幾難。佢話對付外殺應該用洩嘅方法，減弱佢嘅力量，唔可以同佢硬碰。之後佢口中念念有詞，跟住合指一算，面色一沉 ....

(完結篇)

跟住師傅同我講，話我個女會返黎同我一齊住，我就講俾佢聴我個女逢星期六，都會由我媽咪處帶返黎啦，

佢再講係我個女將會長期同我一齊住，同時話小心屋企嘅老人家添，心諗我爸爸同媽咪都唔夠六十歳，

最多都係跌傷或係一D小毛病。我仲問佢係唔係一間唔好嘅屋，會影響我父母兄弟姊妹呢？

佢話係，如果你有兄弟姊妹買左間風水屋你亦都會受益，所以買屋要小心D。之後就教我安放風水物品，

仲話依D只可減弱部分殺氣，最佳方法就係搬走。

又過左一段時間，老婆身體續漸康服，師傅之前講嘅話都開始淡忘。直至某一個星期六，

我地如常到我媽咪屋企食飯，跟住帶我個女返屋企，平時帶佢返屋企時都係笑住走，但今次當我媽咪將佢交俾我老婆時佢突然放聲大哭，我地由觀塘搭的士返去黃大仙屋企，

佢都未停過，個的士司機仲以為我地拐佢添。返到屋企都未停，我地輪流哄佢到深夜十二點，佢先收聲瞓咗，可能哭到累掛。

又過咗一個月，我細妺打電話俾我，話媽咪最近面色好差，除廋咗之外，仲有痾血。

我地連忙帶佢去睇醫生，經檢驗後証實患咗末期大腸癌，經過施手術同幾個月化療後，

都敵不過癌魔離開咗我哋，終年六十歳，後來記番師傅所講嘅話，都一一應驗。

之後我將個女交俾屋企附近個朋友日頭幫我揍，夜晚放工再接佢返黎瞓，大約維持咗半年。

有一晚，我地同個女喺睡房牀上面玩，佢果時大約兩歳到，時間好似係十一點幾，

佢突然玩玩下停咗，呆呆咁向上望住天花個牆角，我地問佢望乜嘢，佢話有個BB仔喺上面游水，

我地聽到之後，連忙熄燈大被蓋過頭瞓覺。

因我驚我屋企人有事，所以決定搬離依間咁邪嘅地方，另覓新居，後來有一對外國回流嘅夫婦朋友，

見我地空置咗間屋好浪費，就同我地講想搬入去住，我都講哂我嘅經歷俾佢地知，

但佢地話自己係無神論，唔驚依D野，仲話幫我地俾埋每月供樓錢，果時樓價好低，

每個月都係供千伍元，我見佢咁講而且又可幫補我出面租樓嘅租金，就應承佢地，

我都同佢哋講，如果有乜唔妥就自己執生啦。之後過咗一年，個男友人同我地講唔租啦，

我問點解，佢話間睡房成日陰陰涼，尤其係冬天，柵哂窗蓋兩張棉被，再加一張毛毯喺床褥上面，

都涷醒。最後依間屋一直空置到，禁售期完結後就賣出咗。

我老婆個甲狀線病由搬離依間屋後一年，就康愎咗，你哋話邪唔邪？

轉載請註明來源：今天頭條