2016無綫重頭劇曬冷...今日一次過公布十多套明年重頭劇

《2016無綫節目巡禮》今日一次過公布十多套明年重頭劇，當中最矚目肯定係《使徒行者2》，雖然冇咗林峯，但仍有佘詩曼、苗僑偉擔正，加上好戲之人許紹雄、江美儀及長腿人妻陳敏之，戲碼十足！而小生之一陳豪擔正嘅《潮流教主》及《來自喵喵星的妳》，其中由《鬼同你OT》原班人馬開拍嘅《來自喵喵星的妳》，以半科學化解釋喵星人來到地球，同地球人爆發連串驚喜搞笑故事！

女演員方面胡定欣除了主演《來自喵喵星的妳》外，另有兩套分別係《城寨英雄》及《一屋老友記》入圍，定欣於三套新劇中戲分極重，TVB明顯想捧佢上位！而蔡思貝亦唔輸蝕，亦孭飛三劇《味想天開》、《潮流教主》及《純熟意外》！

綜藝節目方面，由黃翠如主持嘅旅遊騷《世界打工冇假期》及曾志偉與錢嘉樂等原班長老主持嘅《獎門人20周年Super Show》，亦令人期待！