《張保仔》第三集4大「膠」位

第三集《張保仔》，講到演警察嘅陳凱琳(Grace)終於發現陳展鵬(煎pang)真正身份原來係賊王，身為正義差婆嘅Grace梗係唔放過對方，更展開一場驚險槍戰！

膠位一 銀仔硬過子彈？

槍戰一開始，煎pang一個側身就避開子彈，咁都未算誇張！Grace中槍後居然冇事，原來佢發現之前喺張保仔洞拾得嘅銀幣，幫佢擋咗一劫！嘩，銀仔都可以擋子彈，咁差人仲使乜著避彈衣？之後，Grace單人匹馬繼續追捕煎pang，左閃右避咁避開曬子彈，勁到呢！

膠位二 側身避水龍捲？

煎pang被Grace追捕途中，見眼前出現水龍捲，即將快艇駛離水龍捲，最後仲側身跳海得以逃生，咁都唔死果然係神人！至於Grace走唔切被捲入水龍捲中，就咁開始穿梭時空返回清代嘅劇情！

膠位三 再避子彈

Grace於海中遇見張保仔(洪永城飾)，當時張保仔等人被清兵追捕，更一齊被清兵炮火轟至清兵炮船上，認真騎呢！之後，Grace同張保仔於船上兩個打幾廿個，直頭勁過宇宙最強甄子丹啦！咁都未算，最勁係Grace又再發揮一次神乎奇技，近距離再避子彈，絕對勁過007！

膠位四 有迴音

有不少觀眾發現船上大戰期間，無論Grace或張保仔講嘢都有迴音！而大部分海戰鏡頭，就係TVB所講不惜工本投入3千萬製作嘅3D特技，即係演員先於廠景完成動作拍攝，再用電腦CG加工製作而成！唔通喺廠景拍嘅關係，收音就變差咗？定還是3千萬就全部用嚟搞好CG，而忽略其他細節位如收音？

《張保仔》第七集4大「笑」位

嚟到《張保仔》第七集，講到「七海爭雄」快將展開，鄭一嘅死對頭黃義正密鑼緊鼓打擊異己，決意挑戰鄭一之地位。而鄭一則誓要力保海盜盟主之位，雖然佢自以為正當盛年，但其實已經不復當年勇，令保仔眾人擔人不已。雖然劇情看似好傷感，不過「笑」位依然不斷。《新地網》就精選其中四個，睇嚇你笑唔笑得出先！

「笑」位一︰向少林足球致敬

繼上次「善良之槍」，今集又有向星爺致敬嘅情節。講到黃義同另一海盜頭目「鐵頭羅四」輸賭，黃義贏咗之後一嘢打落對方個頭度，再加句「鐵頭功吖嗱！」

相信觀眾一望就知，係少林足球入面嘅經典場面啦！

「笑」位二︰向John哥致敬

唔只係向星爺借橋，連電視廣告都成為張保仔嘅參考對象！

劇情講到鄭一年紀老邁，已經不復當年勇，連自己嘅耍家武器「鬼頭刀」都拎唔起。於是金剛同戴耀明就好順理成章咁講咗句︰「再鋒利嘅刀，都有生鏽嘅一日。」

如果加埋句「何況係人呢」咁就正啦，直頭係將姜大偉嘅經典廣告重新演繹！

「笑」位三︰食字gag再現

黃娣妹知道鄭一年事已高，所以建議「七海爭雄」由打擂台變做打甂爐，仲要討論鬥食得多咩先算贏。

呢個時候妹頭就提議食午餐肉，作為古代人嘅孫秀才當然聽到就即刻O咀，話「五餐都食肉！點食呀！」其實呢啲食字gag…唔知係心理作用定點，小編總係覺得蔣志光講呢句對白嘅時候都忍笑忍得好辛苦…

「笑」位四︰擺家燕媽媽上檯

妹頭見鄭一揮唔到刀，即刻上前扶住佢，之後仲好好心咁建議鄭老大唔好舞刀弄劍，話不如學家燕媽媽跳十字步咁話！

咁又係呀！年紀大就唔好做咁劇烈嘅運動，學嚇家燕媽媽啦鄭一！

睇嚇點3千萬大製作

TVB為突顯《張保仔》3千萬大製作有幾咁巴閉，特設張保仔 CG BEFORE & AFTER網頁，實行將3D效果曬冷！至於係咪真係講到咁勁，大家自行判斷！

完

轉載請註明來源：今天頭條