早前《十大變形女神》以及《八大變形金剛》羅列出娛樂圈中變形有法嘅型男索女，個個面尖咗鼻高咗，佢哋本人開心大家又睇得開心。不過就唔係人人都咁好彩，變完一定好過以前…《新地網》為大家送上變形系列第三彈 -《七大愈變愈禍藝人》，睇嚇有邊個係唔變好過變…

膠吃了這女孩 傅穎

前女子組合Cookies出身嘅Theresa，初出道時包包面眼細細，同女神扯唔上關係。但自從北上搵人仔，長做長有狂拍內地劇，仲吸納咗一班宅男粉絲。不過個樣就愈變愈膠，進化成大眼尖面嘅公仔樣，表情毫不自然，真係隨時連佢班餅碎姊妹都唔認得！

Theresa多次被問有冇整容後，就帶點晦氣咁話︰「你哋無非都係想知我有冇整過，大家覺得有就有，冇就冇，已經到咗一個唔需要解釋嘅地步。」

P圖達人 宮雪花

1995年時以47歲之齡參選亞洲小姐，闖入最後五強，自此聲名大噪。花姨雖然年屆67，但不讓一眾後生女專美，經常衣著出位嘅佢不乏性感打扮，可謂風韻猶存。不過近年個樣就愈來愈唔自然，面部浮腫，好似以前仲好啲喎！當被人質疑係整容時，自信心爆棚嘅花姨就話︰「我覺得佢係妒忌我，我好高興有人妒忌我，因為到呢個歲數都仲有人妒忌。」

花姨仲要靠電話app自欺欺人，執到對眼外星人咁大，塊面白到發光咁。不過有時執得太厲害，搞到身邊條欄杆變曬形都冇留意…

仆崩鼻 韓君婷

1997年亞姐冠軍韓君婷，混血索樣加上fit爆身材可謂艷壓全場。佢於2010年淡出娛圈，到新加坡協助兄長打理生意。但近年再次現身時個樣變到幾乎冇人認得，尤其是個鼻變化最大。

韓君婷否認自己整容失敗，強調「我沒打Botox，沒整容」指自己當年喺新加坡定居時喺浴缸跌倒，撞傷鼻骨導致變形。不過拉直鼻骨嘅手術費加上住醫費就要五萬新加坡元(約29萬港元)，對此佢表示「太貴啦，我覺得又冇咩影響，所以冇做到。」

萬能key不再 徐子珊

2004年香港小姐冠軍徐子珊，入行後愈來愈靚，本身有啲包包面嘅佢變到面尖尖，鼻樑又直一直。不過隨住事業發展未如理想，徐子珊似乎開始走樣，不單輪廓僵硬，而且面部長期腫脹，多次被指係整容失敗嘅後遺症。當提及整容傳聞，佢就反問說︰「你覺得我有冇問題？其實只係影相同角度問題，唔需要理會嗰啲報道。」

近年喺大台苦無突破不特止，更慘成網民瘋狂恥笑對象，次次出嚟都被人話唔同咗樣。所以心灰意冷下決定不續約，向珠寶設計事業方面發展。

變臉大師 鄭裕玲

人稱DoDo姐嘅鄭裕玲年輕時絕對係個大美人，不單演技出眾，而且口才了得，喺演戲同擔任司儀方面都有傑出成就。但隨住年齡漸長，近年可以話係不停變臉，公開露面時都俾人睇得出佢表情僵硬，面形變得古怪。

多年每次被問及有否整容，Do姐都係一概例牌否認，佢只係話︰「唔係事實嘅嘢唔會回應。」而去到近年，每當有傳媒想提起類似整容嘅提問，佢就會搶先一步話︰「我近來心情好好，唔想再俾啲垃圾報道影響心情。」

Do姐仲同另一位樂壇小花撞樣，佢就係…

Fiona DO

說好的女神呢 王祖賢

曾幾何時嘅女神王祖賢美豔得驚人，1987年《倩女幽魂》中憑小倩一角瘋魔萬千影迷，自2004年息影後定居加拿大溫哥華。但佢近年露面被發現面部腫脹，眼睛同鼻子嘅形狀不太自然，昔日女神已不復見。

面對種種傳聞，佢曾經喺網上拍片澄清，仲話︰「已經離開娛樂圈十幾年，不過謠言或是一些非常不真實的事情一直跟隨著我。」「希望跟大家說，我很健康，沒有問題，不用擔心。」

走遍高山低谷 邵音音

近年活躍影壇、於2008年及2011年奪得金像獎「最佳女配角」的邵音音，係七十年代紅極一時嘅邵氏豔星，曾演出多部三級片。音音姐初出道時容顏標緻，身材火辣，更吸引外國片商請佢拍戲，係最早打入國際影壇嘅香港豔星。

音音姐稱當年陪朋友割雙眼皮時，在醫生嘅游說下用60蚊打一針矽膠到下巴，希望變得更靚，誰不知當中含有致癌物質！其後音音姐一次飲醉酒喺屋企撞傷面部，去到醫院縫針後因矽膠移位導致面部歪歪斜斜。後來想透過手術將矽膠移除，誰不知一動刀就血流不止，因為下巴連接著神經線，動手術隨時會致命！所以佢只好順其自然，從此臉更歪，更因下巴太重而變得口齒不清。

同其他女星唔同，音音姐從不掩飾整容失敗，佢話︰「必須承認自己走過嘅路，因為呃唔到人嘅，呢啲路走過了就變成人生嘅經驗。」

轉載請註明來源：今天頭條