放假，係一個好好嘅藉口，去同一班舊朋友聚下會，話當年。身為參加者，飲飽食醉掉低一百幾十當然心情愉快，但負責做「搞手」嘅話，就真係慘過瞓街，祝你好運。

呢個年代約班舊朋友，開個facebook event或者開個wtsapp group就ok，好似好方便咁，其實暗藏殺機。

有約過人嘅都知，喺facebook開個event，invite 15個人，可以到最後個日都係無人Join、無人decline、又無人留言。

完全無人理。

就算你開個post「去嘅就like，唔去就講低」。

都係無人like，無人留言。

無架啦，你只可以用兩個理由去安慰自己。

1. 佢地無Check facebook

2. 佢地比外星人捉曬

某程度上，佢地比外星人捉曬嘅機會率係高過佢地唔check Facebook嘅。

OK，咁唔好用Facebook，開個wtsapp Group，一次過問，唔洗誤會。

我好記得當日我地喺Wtsapp Group到問阿強：「喂，阿強你嗰晚o唔ok架？」

佢答我地：「正路應該OK。」

我嗰一刻覺得阿強唔做特首，簡直係嘥料。

「正路應該OK」係有層次架，仲係三個層次。

首先嗰日佢一定要「正路」先啦。嗱，我唔知佢「歪路」係點定義，可能佢朝早杯咖啡沖淡咗少少，咁嗰日已經好「歪」架啦。OK，我當佢嗰日正路，都仲要過到佢嗰嗰「應該OK」。

哇，呢句點頂呀！比阿梁振英學咗你話點算？

「梁特首，我想問2017年係咪可以雙普選。」

「正路應該OK。」

到2017年無得雙普選嘅時候，梁特首就會同記者朋友講：「哦，當年我答大家正路應該OK，但呢一年發現好多嘢都好唔正路，同好唔應該，所以就好唔OK啦。」

阿強其實係無答過任何嘢架。

另一個朋友明仔都唔係好好多，佢答我地：「May Ok」。

大佬你有無上過英文堂架！咩叫「May ok」呀！

究竟明仔係「未ok」定抑或「五月先至ok」呢？我睇唔透。其實佢地知唔知呢個世界係要Book位。

唔通佢想我同間餐廳講：「我想Book張檯，張生，8位半。」

「8位半？」

「係呀，因為有一位佢話可能會黎，咁當佢半個啦，你當佢處於一個遊離喺冷

靜與熱情之間嘅舊情人，個感覺就啱架啦。」

佢真係心諗，廚房條拖羅都無你咁煩啦係咪呀！

OK就OK，唔OK就唔OK，未知就答未知，留個時間睇下幾時confirm，都好過「May ok」呀。

一個搞手，就算比佢經歷曬「約人約時間」嘅階段..都仲未驚完。因為喺聚會當日，學術啲即係聚會前嘅5小時，

會有機會發生「飛機潮」。

如果聚會喺夜晚，當日嘅Lunch time會係wtsapp group出現一段簡訊：「今日我咩咩咩，所以唔黎啦。」

缺席嘅理由唔重要，最重要係當有一個人「放飛機」，其他朋友都會變曬Sam哥Cool魔… 登上Jetstar、Cathay pacific、Emtrates，同你黎一個「翱遊天際」。

阿強會講：「其實我今日都有啲嘢忙…既然佢唔去，咁我都係唔去啦！」

明仔又會講：「其實..今日本身陪女朋友，好似都唔齊人，我都係下次join你地啦。」

到時就會有人講：「個個都唔去，咁我都唔去啦～」

係佢地嘅邏輯上，超過三個唔去，就等於個個。

咁個搞手點？喂，其實佢都無癮呀，由一圍檯變半圍檯，再有機會進展到「撐檯腳」，但係佢無得揀。

阿強、明仔、張晨個個都可以「放飛機」，唯獨「搞手」唔可以，因為喺大家眼中，人係佢約嘅。

你無理由自己約曬十幾丁友出黎之後自己缺席，道理上講唔通嘛。

而最悲哀嘅係，當你做咗第一次搞手，你永遠都會係搞手，永遠唔會有人接手。

到下次大家想食飯，就會話「邊個邊個去約啦，上次都係佢搞。」

你當然可以上訴：「喂..上次我搞，今次應該到你地啦！係咪呀！」

呢個時候，你會體驗到朋友們嘅默契同凝聚力，嗰種團結係連巴塞都會比佢地炒起。

A會講：「你搞啦，上次搞得好好。」

B會講：「捨你其誰，認真我真係諗唔到。」

C會講：「講呢啲，係你老哥先叫得郁班人。」

最後你又微笑接受，無限LOOP，再次應付佢地想「豪食」，但又唔可以超過「150蚊一位」嘅無理要求，當一個寂寞的Gathering搞手。

講咁多，既然咁辛苦，點解仲有人肯做Gathering搞手？

因為當佢見到一張長檯坐滿人，盤「刺身盛盒」未放落張檯已經比班「餓狼」清曬，全無儀態可言，幾粒鐘嘅時間，成檯人都係「粗口滿天」。

呢個時候，佢就覺得值得。

係架，做搞手慘過做泥工，

但為咗成班朋友，佢都會繼續做一個泥工。

就讓這一切隨風。

P.S.僅以此文感謝所有Gathering搞手，這篇文章其實是「抽自己水」，因為我是超級無敵難約的，哈哈！辛苦你們了。

轉載請註明來源：今天頭條