古天樂同林峯當年拍TVB劇集《尋秦記》時傳出不和，有指古仔不鍾意林峯在外型同膚色都刻意模仿自己，不過十年人事幾番新，最近傳古仔計劃明年開拍《尋秦記》電影版，拉攏原班人馬包括林峯做「嬴政」，昨晚記者發現兩人相約出席飯局，古仔似足大佬一樣手搭林峯膊頭，兩人身穿款式類似的兄弟鞋，友誼萬歲。

昨晚約9時許，記者在古仔投資、位於銅鑼灣的名廚食肆，首先發現劉青雲的保母車泊在樓下，一小時之後，見到青雲、吳鎮宇同張達明先行離去，三人都飲到面紅紅，低調的青雲見到記者，表現得不多想影相，鎮宇就笑笑口打招呼，由於兩人都住西貢區，青雲就送鎮宇回家，達明一個人截的士走，抗癌勇士達明雖然外型還是好瘦，但精神不錯，臉紅過關公，似乎都飲了不少酒。

直至11點，古仔就搭著林峯膊頭出來，兩人同樣飲到臉紅，一身名牌的古仔，著Thom Browne外套襯Dsquared塗鴉牛仔褲，腳踏價值$5,300元Valentino波鞋，多年前被傳過刻意模仿古仔的林峯，這晚著的波鞋款式同古仔的鞋相似，真是心有靈犀！

記者問為何這麼齊人？古仔鬼馬說：「唔齊人，得兩條友啫。」問他們是不是商討大計？古仔隨口講：「系呀，好大計。」飲了酒的林峯就call的士走，原來古仔特登送林峯落樓搭車，分別前還互拍一下，表現得老友鬼鬼。

轉載請註明來源：今天頭條