人生必然經歷過不斷轉工種，不斷轉公司。但若干年後，你覺得塵世間已經無野值得留戀，所以你只好放棄繼續尋尋覓覓，留喺一間公司奴役終老…因為你覺悟到，無論轉幾多份唔同嘅工種，你始終都係唔鍾意份工。無論轉幾多間公司，個老闆都係咁仆街。原來喺你腦海入面，嗰間共同為目標奮鬥，上下一心去解決問題，努力付出係有回報嘅公司，只係一個現實唔存在嘅烏托邦…

而當我轉咗好多份工之後，仲發現到一樣野，就係每一個辦公室都擁有一群相約嘅「奇行種」…情況就彷如讀書時，每班都有一個被集體欺凌嘅肥仔。象棋都一定有兩隻炮兩隻車。而每一間公司，除咗有個仆街老闆之外，對落總係有一班「奇行種」1去維持辦公室仆街生態。

老闆有幾仆街相信大家都好清楚，OT唔補水、廿四小時睇實e-mail、放假都要覆電話…所以要比喻成《進擊之巨人》的話，老闆絕對係一腳踢爆你人生城牆嘅五十米巨人，而一班同事就係竄入黎啃噬你心智嘅奇行種，以下要講嘅，就係奇行種特性同應對方法。

一） 『你老母係咩時辰生你出黎？』

老實講！真係有同事問過我呢個問題…呢類奇行種對你嘅年齡、住址、家事、私事，甚至乎星座都極濃厚興趣，由你入職開始，就好似查家宅咁「住邊頭啊？幾歲？搭咩車返工？有冇女朋友？」簡直煩過你老母。然而，你永遠無法猜度佢知黎做乜，呢個就係奇行種嘅特性，因為佢可能連自己都唔知問黎有乜用，但佢就總係不停打聽你嘅私人生活，然後作出評價，或者留返食飯Dead air時扔出黎作為話題。

對付方法：對付呢種奇行種，一定要鳩噏當秘笈，佢問你住邊，你答佢b612星球，佢問你有冇女朋友，你就答佢支持同性戀。總之就要破壞佢嘅記憶系統，令到佢連複述返出黎都覺得憨鳩，方可將佢擊退。

二） 『幫我聽住個電話，有人接聽就叫我！』

工作上同其他公司溝通就少不免，尤其係大公司，撳幾十個制，等一輪都未駁到真人聽電話。而呢類奇行種就好似誓要話畀全世界人聽，佢打緊電話咁，開到speaker好似HiFi咁，佢自己就行到老遠部影印機print野，難為坐佢隔離嘅同事就一直被噪音騷擾，普通鈴聲都算數，最煩嘅就係對方電話有接駁鈴聲，我上個月已經聽足成個月容祖兒首《成就了登上懸崖峭壁的女子》。

對付方法：要以其人之道還治其人之身，一趁佢行開咗就即刻CUT佢原本條線，再打去自己內線，然後偷偷地「Long」起個電話，之後大叫「有人聽喇有人聽喇！」等佢仆倒咁返埋位。當佢拎起電話疑惑「咦？點解無人講野嘅？」，你就答佢：「佢可能等得太耐，好似你咁行開咗去print野，唔緊要，繼續努力，聽日一定會好天嘅！」

三）『我嗰張呢？無可能，下張一定係我！咦唔係、咦又唔係…』

我明白撳完個Print制嗰種心急嘅心情，亦明白見到影印機出極都唔係自己野嗰種無奈同挫敗感。但有啲野唔屬於你就唔屬於你，點急都無用。當你順序咁print一大疊開會用嘅文件出黎，當然係想順返次序拎埋位。但呢位性急奇行種就幫你幾張幾張抽出黎，又唔排返次序，到最後你就好似玩襟棉胎輸咗咁，將一疊亂曬次序嘅文件疊齊返埋位重新排好次序。而最令人氣憤嘅係，佢仲用一副怪責嘅口吻同你講:「下次Print咁多張出聲嘛…」

對付方法：每次你Print一大疊文件時，又見到性急奇行種有所行動想行接近Printer，你就要搶先一步衝出去鳩拎曬所有紙返黎。等佢搵餐飽，隔十分鐘先用一副彬彬有禮嘅態度還返畀佢，再補多句：「唔好意思，拿咗你張紙添。」如果佢話：「原來係你拿咗！等我撳幾次！行到出黎又搵唔到…」「係咩？下次print一張咁少出聲嘛，我讓你先。」

今次講住咁多先，下次帶各位行入Pantry同廁所，見識更多唔同嘅奇行種同教大家應對方法。

轉載請註明來源：今天頭條