同一條街有十鳩幾間便利店嘅原理一樣，你身邊嘅friend，梗有一個遇著仆街老闆，次次一坐低吹水就忍唔住要數佢乜乜物物。而我，就係因為仲比老闆留住OT而去唔到re-u嗰個。
咩先叫仆街老闆，呢家野都係萬變不離其宗：
1) 奉旨幫佢OT，返工時間每日到五點半會自動幫你延續到夜晚十點。
活喺呢種仆街老闆魔掌下嘅打工仔，每日去到四點零就會提心吊膽，去斟杯水都要躡手躡腳，因為萬一你嘅呼吸聲太大，提醒咗個zombie老闆你仲存在，咁今次真係仆街了，明明臨放工就叫你開會，又或者叫你做嘢然後扔低一句「聽朝一早比我。」嚇？咩叫一早？而家已經係七點喇喎，過曬工作時間架喇哥哥。結果呢，唯有工作時間自動翻一番：朝九晚六係第一更，晚六朝二係第二更。就係咁樣蝕曬比佢，由五天工作製，變成一星期九天工作製。
2) 無料扮四條，做嘢唔叻但諸多意見，覺得自己係宇宙無敵小神童
仆街老闆點解可以咁仆街，係因為佢睇你唔起 —— 「阿叔我當年一個打十個，一個人搞十幾個project，同一個時間開幾個會（……下刪乜乜七七），一蚊budget當十蚊用，一個consultant當有十個咁使到盡。你係咪想話我知連少少嘢都做唔到呀？」開親會一定滔滔不絕，狂噴口水，但講嚟講去在場都無人明佢想點，係嘅我哋呢D凡人又點會明丫。而至高無上嘅佢，又會成日懶開明咁問你意見。咩話你想講真話？唔好計你將會燃燒多幾個鐘頭生命同佢拗，有無讀過偉大嘅黨史咩叫「鳴放運動」先……
3) 人工低、無補水，出差津貼少
通常嚟講，人工低過市場水平係同老闆仆街兩者一定係掛鉤嘅，你見佢連少少錢都要慳，平時點會唔用到你盡呀？補水就唔好提喇。OT？是你應份的啊。至於出差津貼呢，就計到盡，未至於餓死你嘅傻豬豬但又只係啱啱好夠你食地溝油咁囉。咁當然咩睇病呀、什麼什麼員工福利呀都一律欠奉啦，你是咪high大咗？
4) 螳螂捕蟬，仆街大老闆在後
好喇真係頂唔順，想搵再高一級嘅人報串？嘿，你嗌啦，你嗌破喉嚨都無人救你架喇。每個仆街老闆背後，都總有一個更仆街嘅大老闆。「係，我知佢係有D難頂，但咪當學嚇嘢囉，攞多D經驗嘛。後生仔，最緊要唔怕蝕底！」喂，咁點解從來都無人話「做大嘅，最緊要提攜下D細嘅！嚟，過嚟爸爸抱，下個月開始加你50%人工當鼓勵。」人哋蝕底係應份，自己蝕底就萬萬不能，這就是徹頭徹尾的資本家。
5) 有錢過你
唔係你覺得點解佢係你老闆？完。
仲睇？聽朝唔洗返工呀？係咪儲夠首期喇？係咪唔洗供樓喇？拿拿臨瞓啦柒頭！
轉載請註明來源：今天頭條