話說今日陪女友去去睇Minions，本來假日睇套咁開心嘅片就好開心，不過就發生咗件唔系咁開心嘅事。相信大家有睇戲買過飛嘅都會見識過「位霸」嘅力量，佢地唔知系咪好怕同人類接觸，買飛總會隔開一個位。

咩意思呢？就系如果一行裡面，得返7～10四個位未畀人買，位霸就會專揀8，9兩個位，原本嘅7，10因為畀兩個位霸隔開咗，通常都唔會有人買，位霸就可以兩個人霸四個位，雖然我唔知要咁多個位有乜用，但佢地就系有一種旁若無人嘅孤傲。

大家都睇啦香港睇戲本來已經一飛難求，睇遲一個星期又會畀同事恥笑，但就因為呢啲位霸，本來可以容納四個人嘅座位，側面兩個就由吉位變死位。。

我仲發現，好多位霸都系情侶黎，所以我建議一個人去睇戲嘅人士組成「去死去死團」，專門揀呢類死位坐，左右夾住對情侶傾劇情，或者一桶爆谷傳來傳去分黎食。

所以我揀親位都會貼住隔離買，或者預留兩個空位畀其他人。不過估唔到今日畀我撞正更加霸道嘅「家庭式位霸」…

話說，今次我揀到個中間靚位，本來都預咗呢套戲會有好多小朋友扮Minions大叫，但無法啦，加上咁樣氣氛都幾歡樂。我同女友準時入到場，發現成行都畀班細路坐曬，我望一望座位無錯，日期無錯，時間無錯，亦無買錯另一套戲，喺我茫然慌恐之際，一個疑似系老豆嘅男人就出聲：

「唔好意思，我地系一家人，本來想買曬全行，但畀你兩個霸咗我兩個位，你可唔可以同我地調一調去隔離？」個男人指住同一排走廊側邊嘅3，4號位。

但系…我就系驚無位先預早買飛，而家竟然成為呢一家人口中嘅位霸？

呢個時候阿媽又出聲：「我哋系一家人，想照顧小朋友…」說畢個阿媽就仲露出無奈嘅眼神。我想講我先系最無奈嗰個囉老母。

呢個情況，周圍梗系無人出聲，因為四方八面都系老母，而佢地深信天下間父母都系最偉大嘅生物，耶穌對落就系佢地。

現場一片寂靜無人出聲，戲院職員又唔知去咗邊，不過諗深一層就算堅持唔換位，兩邊小朋友萬一喊嘅話，我就連套戲都睇唔到，所以逼於無奈之下我同女朋友就掉咗去邊邊位。臨行開之前其中一個細路都唔知拿景定贈慶，同我揮手講「Poopaye！」（Minions語拜拜嘅意思）。

最後我想講，有仔有女都唔系咪有特權，系咪大捻曬？咁我特登預早買飛有乜意思呢？家計會仲叫人生夠五個，五個小朋友連埋老豆老母已經七個人，到時所有動畫都會畀呢類「家庭式位霸」佔領。

作者 IG：BlueGodZi

轉載請註明來源：今天頭條