出身於草根家庭嘅我，父母從細到大最信奉嘅價值觀就係知識可以改變命運！於是佢哋將後悔嘅光陰投射喺我身上，篤促我努力讀好書，而我都無令佢哋失望，成功入到大學，只係結果令佢哋萬念俱灰！
當年小弟誤信讒言，聽咗啲師兄、老師講跟興趣揀科，最後揀咗讀social science呢個被後世年輕人冠名嘅「神科」，成個課程又真係無學到啲咩實質技能，學習咗一肚子嘅理論但收入竟然無法果腹自我，實是諷刺！我前往ATM將今個月嘅所有人工＄13,000全數提出，然後扣除日常交通伙食同基本娛樂費用，淨低嘅都係上貢母親大人。
晚飯過後，我趁屋企人睇緊電視諗住送上家用表心意。
「媽咪，今個月家用啊！」
「嚇，得6000蚊咁少！」
心中嘅無名火已經悄悄燃起：「已經差唔多半份糧仲想點！」
「你正一衰仔嚟，比咁多錢你去讀書，讀屎片㗎，搵得果萬三你不如去洗碗！」
我靜了…..
我一言不發唔係因為我認同娘親所言甚是，而係我明知佢呢種思想係錯嘅，但我完全反駁唔到，嗯！的確洗碗都高人工過我。
凝結咗嘅對話令背景嘅新聞台旁白更為鮮明：「早前襲擊誤闖禁區遊人嘅老虎已經被擊斃！」
冇錯，我就係果隻老虎，錯嘅唔係我，但被人槍決受罪嘅卻係我！
「讀咁多書搵$13,000 」每次聽到都好似要無故俾人拉去打靶咁，你話會唔會想喊啊？
轉載請註明來源：今天頭條