好多人都知兆麟苑個山仔同公園(即係有個木船遊樂場果度)埋咗好多白骨, 因為之前個度係個島, 好多年前D漁民意外浸死, 因無錢安葬, 好多時就隨便葬係果度, 但政府唔將個山仔剷平. 因會嚇怕住個邊D人

其實兆麟苑真係好邪, 我朋友住過貴麟閣, 即係算係最近公園果座, 都9, 10年前既事, 太耐我唔係太記得好仔細, 只記得重要既細節

佢層樓係買既, 入去住左排本來冇事, 係唔知點解好多時夜晚返屋企, 架電梯會自己停係8樓(我朋友住12樓), 同左看更投訴, 但話有人來檢查過又冇事, 但情況仍然成日都係咁 (我朋友份工好夜收工)

終於有一次, 果次佢病病地,唔知係唔係咁個人弱左, 搭電梯時LIFT又停8樓, 門一開, 佢好清楚感到有人行過佢身邊, 仲好似手臂掂到下咁, 相信係有"人" 本身企佢後面, 電梯到就行過佢身邊出左去

我朋友話佢當時又唔係好驚, 但就好出奇咁細細聲 嚇~~左一下...

咁之後以為冇野,但佢返到屋企突然覺得好凍, 間屋有D風咁, 佢閂曬D窗都仲係好凍

到第二晚佢返家時都驚驚地, 但都要返架啦, 就頂硬上, 但今次架電梯冇停8樓, 佢就鬆左一口氣, 返到屋企開鐵閘開門, 佢想入屋果下, 突然手臂又係有D野掂到, 好似有人行過佢擦身而過入左佢間屋

果下佢堅好驚, 因為佢一個人住, 果晚開始佢就成日覺得屋入面有人, 佢瞓覺時成日聽到書房有聲傳出, 好似D深沉既呼吸聲咁

佢同事就叫佢去紙札鋪問, 一問之下, 阿姨話佢"嚇"果一聲太多事, 隻鬼當時其實已行返轉頭冇出電梯, 跟左佢返12樓屋企

咁我朋友一個人住一間睡房一間書房, 隻鬼可能見有位就住埋落嚟~其實冇咩惡意, 只係貪得意咁

後尾我朋友就聽阿姨講買D野返去燒下, 叫隻鬼走, 點知都係唔得, 都係夜晚成日聽到有聲, 總之覺得有野一齊住

雖然阿姨話冇咩惡意, 但我朋友都係頂唔順, 後尾佢聽個師傅講, 話本身間屋個格局係招鬼, 公園D鬼有時貪得意會上去住下, 所以貴麟同詠麟呢2座最近公園既係最陰, 本身隻野可能住開8樓, 但見我朋友感應到佢咪同佢玩下, 個師傅同個阿姨一樣, 話隻野冇惡意

不過我朋友都係頂唔順, 於是佢聽師傅講搵人裝修過間屋, 好多位郁過, 等隻鬼唔認得間屋, 同埋拆左個書房等佢知冇位住

裝修左真係冇再覺得有野,但都成日有D怪風陰陰地, 可能因為唔係好多光線入屋, 定係裝修整完仲衰, 我朋友份工突然唔多掂, 平日又好黑又比老細拖糧, 好快就賣左間屋搬走埋返家人度住....而家果度點就唔知了......而我同呢個朋友後來亦冇咩再聯絡, 但FB見佢都仲好地地冇穿冇爛咁既

轉載請註明來源：今天頭條