成日話藝人身為公眾人物預咗俾記者跟蹤同影。
但有時記者唔聽藝人講起勢咁跟，真系佛都有火。
陳冠希
好似被傳做咗人老豆嘅陳冠希，日前就被記者窮追猛打，忍唔住發火。
話說陳冠希自從戀上內地模特兒秦舒培之後都非常低調，最近有傳二人已經拉埋天窗仲已經喺美國生埋BB。
記者收到風當然唔會放過佢，於是就喺機場捕定Edison！
Edison現身機場時都笑笑口，仲叫記者唔好跟，因為佢唔想回應。
但點知記者雖然收口唔問，但就一路跟一路影住Edison，搞到Edison無名火起。
指住記者嚟鬧同埋影返佢哋轉頭話會擺上網，而最後Edison並無將照片放上網，放過記者一馬。
報道一出，勁多人撐Edison，並插爆記者，覺得佢哋唔識見好就收。
仲話藝人都有隱私，就算要交差都要學識基本尊重。
Edison獲得咁多人支持，相信佢都應該下返啖氣喇～
鄭嘉穎
鄭嘉穎同陳凱琳嘅忘年戀就系人都知！
當初不被睇好嘅佢哋宜家感情非常穩定，仲成日傳出結婚嘅消息。
之前鄭嘉穎孖住女友陳凱琳去水果檔買香蕉，點知發現記者，於是就叫記者唔好再影。
雖然記者有表明身分同埋話會保持距離，但鄭嘉穎始終覺得被騷擾，所以要求記者離開。
但記者苦苦堅持，搞到鄭嘉穎嬲到要反偷拍。
可惜呢招無用，最後嘉穎決定由得記者繼續影，行返水果檔搵女朋友。
仲疑似情不自禁話咗記者一句「廢青」。
不過佢都表明自己唔想被影，但都講唔掂數，都唔知誰是誰非喇～
郭富城
最近新婚之喜嘅郭富城同老婆恩愛非常。
但查實城城未高調認愛嘅時候，曾經post過一張拖手相，引起眾人猜想。
估緊相中手系屬於邊個，最終記者查到只手嘅主人原來系方媛，於是就去機場捕住佢！
當時幾個記者圍攻方媛，不停咁影啊影，仲問佢問題，令佢不知所措，不停掩面求救。
後來城城單手插住袋咁從後現身，好客氣咁叫記者唔好再影，再護送方媛離開。
呢一幕冧死好多女網民，話城城嘅出現就好似白馬王子咁，呢招對付記者真系高啊！
林宥嘉
話說當年林宥嘉同鄧紫棋嘅異地戀曾經轟動一時。
當時Yoga遠道而嚟陪阿Gem拍拖，但就被記者發現，仲要跟埋上去當面影佢哋相。
當時戀情啱啱先萌芽嘅佢哋當然非常緊張，Yoga亦都好有風度同霸氣。
上前同記者理論，希望佢哋唔好再影，仲發生咗少少身體碰撞。
後來呢件事被大肆報導，唔少網民就話支持Yoga，覺得佢身為男人保護女朋友系非常合理嘅事。
相反系因為記者不停糾纏，先會釀成碰撞。
轉載請註明來源：今天頭條