GreatDaily

講嘢口窒窒? 唔好食澳牛，我怕你難堪。

今早小編心癢想食澳牛，我同朋友講：「我去澳牛」，朋友問我：「有事睇唔開? 生活太美滿?」

有看過經典潮文《澳牛的黃昏》的朋友，都知道茶餐廳澳洲牛奶公司，最出名「光速餐」 - 一個客人，由入座到埋單，據稱只需600秒，十分鐘，但過程猶如飽經二戰。亂世中進食，「快」是硬道理，排隊快、落單快、上菜快，你唔可以食得慢，因為你食到一半，就會有伙記望住個碟問你「食曬未? 我拎佢走」；你起身諗住埋單，收銀阿姐見你揸住張紅衫魚，遙遠已經找定錢畀你。

慢，是一種罪過。

這就是澳牛。

其實，食澳牛光速餐而已，大家無需害怕，只要夠快，識得跟上澳牛伙記的步伐，你會發現，澳牛BB實在很可愛。

以下的內容，並非為澳牛平反，乃是真人真事。

-----------------------------------------------------------

排隊等位，十條友喺前面，一般來說，你都要等上幾分鐘。在澳牛，你只需要等53秒。對53秒，我計咗時。

GreatDaily

帶位的伙記，聲音沙啞像陳奕迅，問：「幾位? 入嚟!」我強調，這一句沒有尾音，而我像被時代推進般衝了進去。從帶位的一刻開始，Eason一句就將你的固有人性尊嚴徹底擊潰，技術性擊倒，我跟自己說：我是牛我是牛。

為何人們食澳牛食到一肚氣? 很大原因是他們落單太慢，被伙記白眼。不過，只要你落單夠光速，就能夠同夥記做好朋友。何謂「光速落單法」? 先來看看以下人類文明推進過程：

GreatDaily

1. 一般音速落單法

就係平常的落單法，睇menu，望嚇牆身貼住啲推介... sorry，你已經輸在起跑線上，伙記已經問咗你三次「食咩」。然後你再慢慢道出四個字「茶餐唔該」... sorry，你個該字未講完，伙記已經問你「炒蛋煎蛋意粉通粉多士麵包?」你聽唔清楚? 「炒蛋/煎蛋? 意粉/通粉? 多士/麵包?」請你立即做好人生抉擇，成件事已經成分鐘。記住，佢嘅標準係要600秒內KO你。

一般音速落單法，兩個字 - 失敗。

2. 超音速落單法

Based on 一般音速落單法，我哋大抵可以知道，澳牛伙記最關心的問題，是「炒蛋煎蛋意粉通粉多士麵包?」

超音速落單法，就係入座前背熟落單口訣。一坐低，伙記問你第一次「食咩」，你猶如兵役報到，字正腔圓大叫「茶餐炒蛋通粉多士」，伙記可即時照單全收，三秒完事，超音速。

3. 超光速落單法

先旨聲明，此方法只適合霸氣人士使用。

眾所周知，光比聲音快，簡單啲講，我哋睇嘢係一定快過聽嘢，所以「超光速落單法」，就係用「視覺落單法」。

將你要嘅選項，一次過寫低，記住要精簡，易睇，例如以下iPad內容所示：

GreatDaily

伙記行緊埋嚟，你唔好等佢開聲，唔駛講嘢，遠遠就拎個iPad出嚟照住佢，由訊息表達到完成接收，成件事光速搞掂，三秒都唔駛。

能夠用超光速的方法叫光速餐，融入澳牛伙記快線中的生活，你就夠Quali感受澳牛的可愛。

-----------------------------------------------------------

小編小試牛刀，用比較基本的「超音速落單法」，成功過關。

GreatDaily

GreatDaily

美食光速到站

永遠快到你估唔到的澳牛，在我落單後五秒，檯上已經出現一碟通粉。

五秒。

但我叫的是意粉。我想辯駁，伙記大喝一聲「細路，唔係你嘅嘢唔好掂！」小編二十有六，不知有幾多年入機舖無畀人check身份證，在澳牛，我是細路。

再過三十秒，意粉，煎蛋，多士全部到齊，我戴著的earphone，播著Juno新歌《念念不忘》，chorus都未到，我已經食緊嘢。

快丫嘛，我識做，係咁食。

轉載請註明來源：今天頭條