我以後唔會同驚鬼既女友去旅行，因為佢會晚凌晨叫醒你陪佢去廁所

唔怕鬼，應該與性別無關。

有啲男仔好怕鬼，有啲女仔夢想就係想見嚇鬼係咩樣。

不過，我女朋友就非常怕鬼…

有幾怕？佢連夜晚見到屋企涼曬衫都驚。

「乜你無聽過咩？如果對拖鞋好整齊咁放喺床邊，夜晚啲會著住佢㗎！」女朋友話。

「但拖鞋同涼衫有乜關係呢？」

「你諗嚇，隻鬼無可能著你對拖鞋，但唔著你啲衫㗎嘛！」

佢又幾有道理…

不過都無乜所謂啦，至多咪夜晚唔涼衫囉。不過…同怕鬼嘅女朋友去旅行，就好大件事！

喺女朋友心目中，酒店係必然有鬼！

所以啲入房前先敲門啊、拜四角啊、睇嚇有冇放聖經啊、夜晚唔好開窗簾啊…

佢一定做到足，試圖令隻鬼唔好喺佢面前出現…

而最大嘅問題就係，每晚…係每晚！女朋友都會起身屙夜尿！

因為佢太驚，一定要叫埋我起身，企喺廁所門外守候佢。

「起身啊！我想去廁所！」頭幾次，可能女朋友太急，佢狂拍我雞心。嚇到我連個肺都差啲跳埋出黎。

「咩、咩事？」

「我想去廁所。」

「去啦去啦…」

因為我住嗰間酒店房，所有燈制都喺曬門口，門口隔離就係廁所，即係我行得去開燈，不如直接陪佢去仲好。

女朋友覺得一睜大眼就會見到鬼，所以佢會成個頭痴實我背脊，我好似隻導盲犬咁帶佢去廁所。

呢一招命名為「四腳獸」，係佢喺海洋公園哈佬喂度學返黎。

點解又要驚又要去？我都唔知…

「哈哈，我哋又變物做四腳獸啦～」女朋友喺黑暗嘅酒店房苦中搞笑。

「係啊～」

「噫啊都係唔好講，我諗起隻鬼有四隻腳都幾恐怖！」

「…」

「下次呢，叫醒我可唔可以唔好拍我心口，我畀妳嚇鬼死。」

「哦，知道…」等佢去完廁所，變做四腳獸咁行返上床繼續訓。

去到第二晚，我熟睡中，突然聽到有把陰聲細氣嘅女人聲喺我耳邊講…

「我想去廁所啊…陪我去…廁所…」

我嚇到扎醒咗…

「喂大佬啊！嚇鬼死人咩…」

「咁你又叫我唔好拍醒你，我咪細細聲喺你耳邊呼喚你囉！」

「唉～去啦去啦。」

如是者，成個旅程每晚我都被一把女鬼聲嚇醒，然後陪女朋友去屙夜尿。如果我都想屙呢？就要先送佢返上床，然後自己再行去屙，屙完再返上床訓，好鬼多步驟，但無計，鬼叫女朋友驚鬼。

去幾日旅行，其實都唔係太大問題。但係…我前年陪女朋友去咗一整年澳洲！試諗嚇我每晚都會企喺廁所門外守候，幾陰公。

可能你聽完之後會覺得，挑反正你都唔驚鬼，拍乜啫。

細細聲話你知，自己一個孤零零咁喺廁所外面等女朋友，其實都幾驚…

不過女朋友喺我背脊，我唯有頂硬上！

~~~~~~~~~~~~~~~~~~~~~~~~~~

「港女」（Hong Kong girls），一般是指香港女性，但在網上，其含義和用法卻有所不同，多指擁有某些不良特質的香港女人，如自戀、自命不凡、拜金、崇外、漠視他人權利等；甚至可以是一個社會現象（港女文化），亦可以引申用於擁有不良特質的女士身上。「港女」一詞在網上引起十分大的爭論，有意見認為其意思的認受性不足。

轉載請註明來源：今天頭條