近年觀眾睇劇集時，經常大插「一代不如一代」，認為新一輩的小生姐仔演技未夠班，有啲人仲全套劇用同一個表情演繹曬喜怒哀樂！不過昨晚一集《迷》入面，視後 田蕊妮 就話你知咩係演技！劇情講述佢劇中女兒簡淑兒慘被謀殺，阿田將一個痛失女兒的媽媽演得淋漓盡致，兩場喊戲睇到人心都酸埋，盡顯功架！

昨晚《迷》劇情講到飾演阿田女兒的簡淑兒慘被謀殺，於是鄭嘉穎去到阿田屋企，通知對方噩耗。一心等女兒返屋企的阿田聽後當然難以接受，完全唔肯相信，只好不斷講說話呃自己，希望係警察搞錯……

但係證據在眼前，阿田都冇得唔信，隨即喊到收唔到聲，失聲咁滯，最後更激動到幾乎暈倒！由一開始唔願意相信，到得悉事實後傷心欲絕，阿田情感演繹恰到好處，令觀眾完全感受到喪女之痛，好想喊埋一份… 不過接下來的認屍戲先係高潮！

之後嘉穎帶阿田去到停屍間，阿田終於見番個女，不過對方已經係一副沒有靈魂的空殻。不停自責的阿田初時強忍淚水，不過當佢碰上女兒屍體的一刻，眼淚已經完全止不住，緩緩落下……

之後阿田更愈喊愈厲害，近乎崩潰的痛哭流涕，真係鼻涕都流曬出嚟！內心戲自然又帶層次，睇到觀眾好心酸，邊喊邊讚佢演技更上一層樓！

昨晚一集播出後，阿田在IG上載一張碰杯相片，留言話老公杜汶澤讚佢喺《迷》演得好好，所以要同佢飲番杯！

而簡淑兒亦有上載劇照，留言：「對唔住啊媽咪，令你心碎… 我知錯啦,，我走咗之後你要照顧好自己…」仲有句遺言係「記得攞返爹哋嗰40萬!」，又傷心又爆笑！

轉載請註明來源：今天頭條