2年前，我拋棄咗我老婆。當時我地結婚1年唔夠，因為我搭上咗公司一個女同事，佢係靚女，身材正，個個男人都話佢正嘅女人。我地係一次公司活動認識，之後飲咗幾次野，搞咗幾次嘢。

當時我真喺好想同我老婆分開，見了到佢日喊夜喊，我覺得好辛苦好累。氹完又係喊，所以我決定唔要我老婆，因為放棄比任何其他嘢嚟得容易，加上我好中意我女同事，好想同佢一齊。

當然我受盡千夫所指，咩難聽說話都受過，鄧你老婆慘啦，咁好老婆都唔要，條女會中意你？離哂地囉！我老婆好善良好可愛，仲晚晚3餸一湯，但佢好懶成日唔執嘢成日想唔撈。我叫做公司中層，幸運嘅係一早買咗層樓，其實我老婆唔撈，真係養佢唔係咩壓力。但當時我因爲依個原因真係好想同老婆離婚。

但到今日，我好想同返我老婆一齊，但我已經無資格，當日拋棄人，做咗一次衰人，我唔想做第二次同個女同事分手，我真係好想等佢慢慢離開我。我可以做戲呃哂身邊嘅人，我活得好，係離哂地有個全同事都覺得正嘅女同我一齊，但我心嘅空虛邊個知，我到依家先知每段關係開始個陣一定係最好，過幾年就會好似對老婆個陣一樣淡咗咁。唔同嘅係，我d壓力無細過，因為我要做更好去抺走我係賤男形象，比起當日見到老婆喊個種累，更辛苦。

我知道有好多嘢返唔到轉頭，近期成日聽農夫首「偉大航道」，好大感觸。佢有段歌詞話：

大多幾歲 你會想搵返個情侶

老土D講一句 唔係有心就唔好追佢

你諗下佢流嘅眼淚

傷害佢 將來佢 唔再相信愛

你仲點過意得去

愛情係好玩但係唔好玩愛情

你一個唔小心 可能會影響佢一世人

我係過來人 我做錯 咪學我 再做錯 因此我

依個內疚我一世抹唔走，聽朋友講我老婆無去搵第二個，其實我好後悔偷食，因為一個女人由你咩都無，幫到你咩都有，由20歲就跟我跟到27歲，肯嫁比我就係愛我嘅最好證明，但我到依家先至明。

每個男人肯定都會想偷食，不過，偷食前諗清楚。因為你可能會好似我咁輸咗個家

轉載請註明來源：今天頭條