我係呢間寵物店嘅前員工，因為睇唔過呢間寵物店咁樣對啲寵物所以先至辭職冇做

（無論係賣嘅寵物定係顧客攞嚟做美容或寄宿嘅寵物）

佢哋賣嘅貓貓狗狗全部都有病，傷風咳肚痾嘔小腸氣乜都齊，有啲真係肚痾得好嚴重，試過有一日朝頭早返到去，痾都好似泥地咁（成地都係爛屎）

不過佢哋唔會帶佢哋去睇醫生，因為睇醫生要錢架嘛，所以啲貓貓狗狗係未賣出之前病死都係好常見嘅事。

如果真係太嚴重，會影響到啲客人嘅購買意欲，佢哋先至會買啲人嘅成藥比貓狗食，亂咁餵藥，反正都預咗佢哋大不了咪病死。

反正啲寵物係佢哋自己繁殖出嚟，成本其實好細，不過佢會同啲客人講唔係自己繁殖。

如果真係有客人要買佢哋嘅寵物，佢哋有個所謂嘅健康保證，就係拎去獸醫嗰度同佢做身體檢查，

當然間寵物店同個獸醫又係有夾好！根本就係騙人，就算有病個獸醫都話冇病（真係非常可惡）

輪到客人攞去做美容嗰啲寵物，首先佢哋會將客人嘅寵物同佢哋寵物店嗰啲有病嘅寵物擺埋一齊！做美容嘅過程非常之粗暴，打打鬧鬧少不免，

又扯佢哋啲毛，搞到啲狗仔皮膚紅曬（我睇見10分心痛）如果啲貓貓狗狗太惡的話佢哋仲會故意搞到佢哋流血，時候再幫佢哋止血。

所以奉勸各位毛孩嘅家長，如果要帶毛孩去做美容，一定要揀一間可以喺店內睇得清清楚楚做美容過程嘅鋪頭，

千祈唔好就咁放低毛孩自己走咗去，夠鐘先至來接返，咁係十分之危險嘅事！

因為你根本唔知呢啲人對你嘅毛孩做過啲乜

最後呢間鋪頭係喺勝利道已經開咗好多年嘅，個名叫做「加鳩寵物店」（化名）不過我相信呢啲事情係好多黑店都發生緊，唔會係個別事件。

轉載請註明來源：今天頭條