澳門賭業猛人、兼太陽娛樂文化老闆周焯華( 洗米華 )有錢又有型，雖然有位為佢誕下兩名子女的紅顏知己Mandy Lieu，不過佢跟早已宣布會離婚的正印太太陳慧玲( Heidi ) 若即若離，近日兩人多次同場出席活動，表現親暱，似有復合之勢！洗米華與Heidi雖處於分居狀態，但男方一直落力挽救婚姻，日前有指佢決定禁止Mandy返港，終於成功冧掂洗米嫂唔再嗌離婚！唔通真係可以享齊人之福？

「世紀一拖」後 Heidi宣布離婚

靚靚正印洗米嫂及紅顏知己Mandy一直鬥得難分難解，兩人更先後為洗米華誕下女兒，不過15年年底洗米華與Mandy回港時在鏡頭前上演「世紀一拖」，Heidi終於忍無可忍要同洗米華離婚，佢呢個決定亦獲周家上下支持！

雖然宣布將會離婚，不過Heidi展現出大婆的風範，獨力照顧大女周梓潼及孻女周善潼（Damiana），而且每次出席公開活動都係豔光四射，果然係正印當自強！另外Heidi與洗米華家人關係甚佳，周家眾人都認定Heidi係唯一的女主人，見到佢哋不時都一齊食飯聚舊。其中洗米華大仔周柏豪與Heidi尤其投契，經常見到佢哋攬頭攬頸合照，friend過打band。

廣告

復合之勢

不過事情有新發展，去年八月洗米華與Heidi呢日在澳門一同出席好友的生日派對，期間略帶醉意的洗米華到台上大唱情歌冧Heidi，之後仲出手攬到對方實一實，據知Heidi感動到不斷落淚！同月另一個晚宴上，洗米華又擔任嘉賓上台頒獎俾Heidi，幸福感滿溢！

Heidi近日似乎態度軟化，罕有地在IG上載有洗米華在場的大合照，一家三口難得合照，網民們見狀都不斷留言「周太只得一個！」、「周生周太和好如初吧！」等字句！而日前澳門太陽城集團舉行團年飯晚宴，高貴大方的Heidi繼續以女主人身份現身，佢與周家眾人影全家福時，與洗米華一左一右地貼著Damiana的頭，十分甜蜜！至於洗米仔周柏豪就豎起拇指，似係暗示這個家仍然齊齊整整？

廣告

禁止Mandy返港

其實過去一年，Heidi一直堅持離婚，但洗米華就遲遲未肯動筆，花盡心思挽救婚姻，更曾當眾許諾「我只得一個周太！」事實上洗米華十分重視家庭，希望享齊人之福，為了唔觸及Heidi的底線，有傳洗米華禁止Mandy返港，然後用銀彈政策「補償」。如去年送贈一座市值千萬的豪宅，近日又奉上3億作為Mandy及小朋友的生活費，又答應每個月都會飛英國見面，成功安撫嬲爆的Mandy！

唔再嗌離婚

自從洗米華公開話周太只得一個，加上身在英國的Mandy冇再搞小動作後，Heidi心情好了不少，態度亦明顯軟化，終於唔再嗌離婚！而且又風騷在網上曬全家福。話雖如此，但據悉Heidi至今仍未打算與洗米華正式復合，因為Mandy始終係兩公婆心頭上一條刺，呢個問題一日未解決，一日都難以和好如初。洗米華要顧住盤生意，又要周旋於兩位生命中最重要的女人之間，齊人之福，實在唔易享！

全文完

轉載請註明來源：今天頭條