近半年似乎新興左一個現象，就係好多女仔都會自稱「女漢子」。喺網絡marketing嘅角度，似乎自稱「女漢子」，就可以等同於打咗支「港女免疫針」，將自己嘅定位定係「我唔係港女嚟架」呢個位置。

呢個現象，同有一排，有好多明明一啲都唔毒，但係有個個爭住認係獨男嘅「偽毒」現象一樣，其實都只不過係marketing野嚟嘅啫，呃我唔到嘅！（你睇嚇坤哥）

如果偽毒男係「偽毒可恥」，呢班偽女漢子的都可算係「偽漢可恥」。咁究竟一啲明明係港女，平時卻又自稱「女漢子」嘅「偽漢子」有幾可恥呢？以下係我見過嘅例子—-（講還講咪tag人）

1、唔斤斤計較，但係唱衰人唱到通街都知

女漢子嘅形象係點呀？不拘小節囉！所以「偽漢」都會經常標榜自己：「我哋呢啲女漢子，先唔會咁小器囉，樣樣野都斤斤計較，好多野，我轉頭就唔記得架啦！」

但係你又會成日喺Facebook 、IG，見到有人得罪「偽漢子」時，佢會講足成個禮拜人哋點得罪佢嘅經過同細節：「其實我都唔想計較，不過呢次我真係唔可以唔出聲…… （下刪100字）」

你以為單野真係好大件事咩？少年你太年輕了，好多時都係芝麻綠豆，但係「偽漢」就會圍爐取暖講足好幾日，講到全世界都知佢仇家點樣整損佢手指尾嗰塊指甲咁囉，真係好不拘小節。

2、誤以為巴渣同好嘈係女漢子特性

有啲女人明明好嘈好巴渣，但係為咗表示自己唔係港女嗰隻煩氣，總係好鍾意用「女漢子」呢個擋箭牌，來掩飾佢哋係公眾場合嘅醜態。例如嚇親陌生人失控嘅大笑、高八度潑婦式嘅講人是非、八婆一般機關槍式嘅粗口等等。

但係阿「女漢子」！其實你呢D唔係叫「真性情」啊，我想講就算男人喺公眾場合做呢啲嘢，都一樣係好失禮囉唔該！我淨係覺得你真係好嘈咋！

3、鍾意靠自己但係又喜歡show off收禮

一般鍾意扮女漢子嘅「偽漢」，平日都會鍾意嘲笑港女。例如笑佢哋要靠男人，鍾意攞著數。所以「偽漢」好鍾意標榜自己唔貪錢唔鍾意靠男人，有時會刻意post一D自己俾錢嘅消費出嚟，再強調唔係人哋送或者請嘅。

但係有趣嘅係，等到有男人請佢哋食貴價餐廳，又或者送首飾送手袋嘅時候，佢哋又好鍾意post相出嚟炫耀，加句「Thx for all these，懂我的人。（心心）」咁係咪即係其實只不過係平時好少有機會有人幫你俾錢咁解咋？

4、睇唔起港女整容，但自己美圖秀秀到曉飛

啱啱都講過，「偽漢」為咗表示同港女不相為謀，會強烈恥笑港女，其中一樣係鐘意笑佢哋疑似整容。

偽漢：「哇！使唔使咁誇張呀？又割雙眼皮又打Botox，又開眼又隆鼻，真係唔需要囉！」

但係你一打開佢相簿，你都會想問佢：「阿女漢子，使唔使咁誇張呀？你美肌美到塊面白曬blur曬，對眼又撐到大一大，推瘦條要腰同拉長對腳我都唔同你計啦。喂！真係唔需要囉！」

5、串人發姣，但自己先係姣中極品

呢個point，靈感係嚟自2016我最喜愛專業《猛鳩語錄》，credit返先。早排見到佢地有張圖，就係講類似呢個現象，笑到我痴線！

正所謂「偽漢」最鍾意笑其他女仔發姣，但其實好多時又會見到佢一顆「姣姣的心」，會「不經意地」喺社交平台流露咗出嚟。例如一啲文青式嘅傷春悲秋文，其實同一般港女圖文不符嘅文，根本一樣。但係去到第二日，佢地又會好有信心咁笑其他女仔發姣，究竟係咩心態呢下？

文章來源: https://www.twgreatdaily.com/cat99/node1405343

轉載請註明來源：今天頭條