我無返老豆份工好幾年 因為我返老豆份工佢成日都特登扣我糧 原因係話要我比家用 但個陣時我得個14/15歲咋 咁細個就要我比錢佢啦 而每個月我根本唔係返好多日 每個月最多咪2000蚊 我比佢扣到得返一千蚊都唔知有冇
而當我被逼要返佢份工個陣 佢同阿爺夾埋 叫阿爺唔好再比錢我 我每個月返佢份工得個1000蚊都無 除左日日起屋企食飯唔洗錢 其他野都要我自己比錢
另外，老豆間公司其實期期都蝕錢 由開公司到依家都係我阿爺架啲錢
所以我阿爺成日又話洗佢好多錢 而我老豆又肯唔執左去 為左想自己永遠做老細
因為咁樣所以我中五個年比老豆逼我出去做野 佢幫我起學校搞左退學手續
其實我係未完成中學課程
我17歲已經出去打工
---------------------------------------------------------------------------------------------------------------------------
長文...希望大家可以睇哂去..再比一啲意見比我（我打左成兩粒鐘 求大家睇哂去）
我今年22歲..屋企本身有4個人..阿爸、阿媽、我、細佬(今年16歲)
細細個個陣大約起我小學4年班（2004年），阿媽發現老豆有外遇，個陣時個小三係老豆以前起澳洲讀書識既女朋友叫A，無啦啦返左黎香港搵老豆..個陣時全家都成日比A騷擾..日日得閒都跟蹤我阿媽..凌晨又不停打電話過黎我地屋企..又成日無啦啦走上黎我屋企禁鐘叫我地開門..搞到我地家無寧日..老豆仲要幫住A..一齊夾埋蝦阿媽..而我阿爺阿嫲個邊一向都唔鐘意我阿媽..所以都一齊同A&老豆夾埋..為左想趕阿媽走繼續支持老豆同個A一齊..過左差唔多半年阿媽真係好辛苦..支持唔住就離開左呢個屋企...(但我阿媽同我老豆直到2016年11月都未離婚）
而A自此之後就一直日日都入埋黎我屋企度住..日日都見到佢..
過多一年..大約2006年，老豆啲澳洲朋友& 阿A不停叫佢去試下做生意..因為我老豆一向都恨做老細..佢成日覺得自己讀書讀到碩士學位就好巴閉，成日又覺得返工個陣自己唔應該係被人點去做野個個..所以諗都唔諗就同阿A一齊開間公司（但開公司啲錢全部係阿爺比，老豆同阿A係完全無份比錢）
阿A個陣時唔知點解突然消失左咁（大約起2010年），但係我見到佢個陣時大左個肚..個肚100%係我老豆..而佢消失之前個肚我估已經差唔多都有起碼半年至七個月，所以個陣時極度唔明點解.
直到我被逼去老豆間公司返工就明點解
我老豆間公司係賣啲好cheap既精鋼首飾..啲貨長期係起大陸度入貨...而因為咁所以就識到第二個小三，叫阿B。佢係一個大陸人，居住起大陸，佢勁矮又勁瘦又勁醜樣。我認識佢個陣時佢係無香港身分證。
個陣時我仲未知阿B既存在...係大約2011年因為老豆逼我要去佢公司度幫手，我先見到佢真人，但個陣時覺得阿B佢好奇怪，因為成日都同周圍啲商店既人講自己有個老公係澳門人，之後又話自己有個女，又周圍比佢個女張相人地睇。（但個陣時以我所知佢係單身，兼唔會有個女）所以我問返佢，點解佢會有個女，佢就答個個女係佢家姐既。
第二覺得阿B奇怪係因為...我成日都見到佢同我老豆一齊出出入入咁，又成日無啦啦拎成袋衫過黎我屋企洗，又成日為我老豆博命咁，同埋最無奈既係..佢成日都起我放學個陣打比我..又問我起邊起邊起邊做緊啲咩..個陣時我心諗 點解我要答你咁多野 但我亦都估到應該係老豆叫阿B check住我
所以有一晚我就主動問阿B :「其實你係唔係同我老豆有野？」 但佢就答我：「痴線架！點會呀？我同你老豆普通同事咋」 聽完呢句 當然我無信過佢 因為我知道關係一定無咁簡單
之後唔夠半年 我幫老豆返工又發現阿B個肚變大左 個陣時我已經完全肯定佢地兩個有路 100%個肚又係我老豆
而我發現左呢件事之後一個月 我同老豆反左面 因為佢不停咁管制我 成日都check住我 返學放學都check住哂（但我完全無做過啲咩壞事錯事，只係學校有課外活動參加所以我一星期有兩日都5點先離開學校，6點返到屋企）佢已經鬧我遲返屋企 ，同埋屋企真係勁奇怪，老豆成日唔知帶啲咩人返黎，我覺得好睏擾
我真係頂唔順之下 我搬左去阿媽個邊 （但細佬依然起屋企度住）
我同左阿媽講哂我咁耐以黎發生既事....
我阿媽都覺得好痛心..因為老豆咁無人性..成日每逢星期日去飲茶都會帶埋啲女人出黎比我地睇..
而我走左之後得返細佬自己一個起個度..細佬成日都打電話同我傾訴..又話阿B成日都得閒過沖涼..拎啲衫過黎洗..老豆又叫埋我地個工人煮飯比阿b食等等
有一日阿b唔知點解知我老母電話..仲主動搵我老母傾..佢無啦啦同我老母講話我老豆分別同過好多唔同女人上床..又話我老豆搞大左好多人個肚..又話老豆出面有好多女人..之後起電話度喊住咁同我阿媽講話：「不如我同你一齊聯手搞走哂啲女人啦 等你歸位 我唔會同你爭野架 放心啦 我都想你地好返 好想你地一齊返。」
我聽返阿媽講返 我真係覺得阿b好假 起度扮可憐 想厄我阿媽幫佢 因為個陣我的確知道老豆出面又有另一個女人叫C 阿B的確非常想剷除阿C
無幾耐阿b個肚無左 大約2012年7-8月到啦 我地相信佢生左出黎...但個陣時係未見過阿B生個隻野仔
直到起2015年7/8月到啦 個陣時我老豆細佬要搬屋 因為老豆話要慳錢 所以要自己搬 然後要問個阿b拎推車(我都唔個點解要問阿b) 突然阿b呢個毒婦無情情帶個野仔出黎 老豆仲叫我細佬要睇住個野仔 要帶佢過馬路又點點點 仲同細佬講：「呢個小朋友同你有好特別既關係架！不過我就遲啲再同你講」 （呢一件事係我細佬講返比我聽）
然後又過多幾個月..2015年11月度啦
有一日同阿爺阿嫲飲茶..飲緊茶個陣阿嫲突然問我一啲電話微信既問題 好似話咩收唔到信息
咁我一開微信 我就睇到佢第一個對話就係阿b
我忍唔住偷偷地禁入去睇 睇到阿b發左好多野仔啲相同埋影片比我阿嫲睇
之後我再禁入去阿b個朋友圈睇..我先發現..原來阿b一早同我阿爺阿嫲關係好熟..仲見到阿b成日帶個野仔出黎見我阿爺阿嫲同埋我啲姨婆..阿b仲同我啲姨婆（姐係我阿嫲啲家姐細妹）好熟..成日互讚互留言比大家..個陣時我先知原來個女人真係好有心計..短短兩年時間已經入侵左我屋企..
個陣時我已經覺得好得人驚..........
而到左2016年11月仲更加恐怖...因為我阿媽申請左離婚，起11月頭已經正式離婚
咁個陣我細佬屋企個工人有年假 11月頭至11月中有14日要返去菲律賓
咁屋企無人煮飯 我老豆向我細佬表示佢打算邀請阿b日日上黎煮
我細佬講呢件事我聽
我覺得勁驚
之後我同細佬特登起工人離開前兩個禮拜約阿嫲飲茶，飲緊茶期間表示我地起工人唔起度個段期間會上阿嫲屋企度食，個陣時阿嫲明明應承左我地
但到左工人臨走兩日前既星期日 我阿爺阿嫲老豆細佬四個一齊出街食個陣 佢地三個大人夾埋對付我細佬一個
佢地竟然逼我細佬要食阿b煮既飯
又話因為阿嫲唔想煮飯 又唔係日日會煮飯
所以推我細佬去食個毒婦煮既飯
有冇人性呀！？
而當日我細佬佢無出聲 因為佢本身真係一個好乖好聽話既人 佢真係唔敢駁咀
加上佢細細個已經缺乏安全感 細個老豆又錫佢 成日亂咁帶啲人上黎 搞到細佬心理都唔多平衡 所以我細佬個日全程好靜 無出聲 而個三個大人就恰佢一個細路 當佢路出聲=應承左 但我真係完全明白細佬既諗法 我知道佢一啲都唔想
所以我想盡辦法幫我細佬 特登打算14日都叫細佬去我阿媽個邊食飯、或者我同我細佬兩個自己出去食
之後第三日既夜晚 我照舊上細佬屋企接細佬一齊出去食飯
無啦啦老豆出黎 鬧我 點解要日日都出去食 我答佢：「我地唔係日日都出去食 有陣時會係阿媽煮」
佢就起度問：「阿b會過黎煮飯 點解唔比細佬食」
我幫細佬答：「因為好幾年前 阿b上黎煮飯 細佬食過一次 真係肚柯」
我老豆就鬧我：「依家我係問緊你細佬唔係你呀你做乜逼佢呀！ 你同我收聲！」
我反駁：「個個阿b係我地邊個呀 點解要逼細佬食佢煮啲野呀」
佢竟然講左句：「你再大聲啲講多一次！」
我就知道如果我講多一次 佢一定會趁呢個機會去公開佢同阿b同埋帶個野仔既事 所以我無再出聲.........
但我都堅持日日同細佬食 所以最後阿b無黎煮
我以為呢件事完結左...但原來唔係..係愈黎愈恐怖....
到左最近上個月....老豆唔知發咩神經 主動向我細佬公開左阿b同老豆既關 仲話個個野仔係我同我細佬既弟弟 又話有血緣關係
之後仲叫我細佬唔好話我知住 仲話因為覺得我細佬一定要知 因為對佢有好直接既關係 仲要求我細佬個晚要同阿b同個野仔食飯 當然我細佬個日唔肯去....
佢公開完之後我細佬個一晚喊到收唔到聲 我細佬個晚失眠
（到第二日我細佬同我講返呢件事 我先知道.....）
而第二日我阿爺又無啦啦約我細佬食下午茶
食食下又講起阿b既事..又話一定要認個野仔做我細佬既弟弟
又話係有血緣等等
到左最近1 月頭
我細佬個陣開始考緊試
我細佬咁岩11&12號無科目要考 放假
我阿嫲主動問我細佬同唔同佢地飲茶（指明有阿b起度）
細佬知道阿b個兩日都會出現 所以就用考試要溫書黎推左去
但起11號下午1點幾 阿嫲無啦啦主動問細佬買唔買野 （勁少有 因為佢地成日話我同細佬因為買野而洗佢地好多錢 但其實事實我地無成日同阿嫲一齊去買野）
好啦細佬落左去 個陣時阿嫲起買野個陣又突然提起B
話以後阿b約飲茶一定要去 又話成日推左去好無禮貌等等既說話
當然我細佬聽完就算 無理佢
到12號個日 細佬要剪頭髮 阿嫲帶佢去
剪完頭髮又叫細佬去買野
起買完野個陣又提阿b
又係講同一番說話
仲提起個野仔
話個野仔係同血緣等等既說話
又叫我細佬唔好比阿媽茶毒（下？我阿媽咩都無講過囉）
我細佬又係無理佢 唔出聲
到左13號星期六 個日我收工 打算搵細佬
細佬話要上去阿嫲度幫姨婆拎信（因為姨婆托我細佬幫佢拎）
咁岩細佬屋企3-5點停電 所以我都同細佬一齊上去阿嫲阿爺屋企
一上到去開頭無乜野 只係飲左碗湯 之後拎左封信 同埋佢地比左盒蛋卷我同細佬
到左臨走個陣
突然間 阿爺又講左句：「如果阿b約你地去飲茶 個個都要去」
之後我地無出聲
佢地又加句：「聽唔聽到？」
我扮唔知發生咩事
之後阿爺阿嫲就你一句我一句開始黎料
阿嫲就講：「阿b個仔你唔知咩？」
我答：「我唔知喎」
阿爺：「你阿媽個陣時知道哂架 你點會喎知 你阿媽知架 你阿媽知架」
阿嫲：「個陣時阿b生左出黎啦 個個仔依家讀緊幼稚園 準備要上小學 但大陸讀小學要錢架 成幾皮野 香港就唔同啦 有免費教育 幾皮野我地實係比唔到佢啦 所以一定要佢落香港讀書啦」
我聽完呢啲說話好想喊好唔開心 好想走
咁岩阿b打去阿嫲屋企電話
我趁機會話姨婆約左我地起樓下等 要拎返封信比佢 之後就扮好趕咁走左
山左門之後 我同細佬聽到阿嫲阿爺好大聲既對話
阿嫲：「佢真係唔知咁喎」
阿爺：「佢點會唔知呀 佢扮唔知咋」
聽完呢段野 我真係覺得好驚..好唔開心
*****如果仲睇緊既你地..可唔可以比啲意見我..
我細佬今年先中四..距離一段日子先升大學
我好擔心個個女人同個野仔會入黎我地屋企
我好想諗盡方法阻止佢地
如果佢地一入黎我細佬就好慘
我好想等細佬過多幾年讀完大學離開呢個屋企前呢個女人都唔好入到黎.....
我可以點做............
PS: 個女人好似暫時起香港仲未同老豆結婚
同埋我好想告個女人坐監 好想佢死
我好想知香港有冇咩條例治到佢地
轉載請註明來源：今天頭條