我好嬲，我真係好嬲…

到底我同大榴槤有咩深仇大恨。

經常偷我文都不特止，今次仲用埋我張相！

先不論揀張喺巴士上嘟嘴吹廢青扇嘅相…

你老味你打格打一條線咁趣緻？！

不過咁…

由下午到而家，我收到好多讀者豬豬來信，話我幅相畀人偷咗嚟用。

感覺其實幾窩心，至少無人話 「原來你咁反智，我以後唔睇你啲文！」

我知！我知！你班花生友期待緊我又寫篇文去報仇嘛。

好啦，不過睇完記得幫手Share開去啊！

＝＝＝＝＝＝＝＝＝＝＝＝

是咁的，我張相被一個叫「大榴槤」嘅網頁拎咗嚟用

不過又唔係洩露裸照，單新聞又無聊，應該無乜人知嘅～

不過…事實上並唔係我預期咁。

我一返到屋企，門都未閂阿媽就飛撲埋嚟攬住我隻腳。

「我上星期先畀完家用咋喎…？」

「仔～我怪錯咗你啊仔～」

「咩啊…」

「我一直都以為你又懶又蠢，讀唔成書，一世無發達，成世靠屋企，等我同你老豆死咗就吞咗間屋同遺產，繼續做廢青。」

「原來你一直瞞住我讀大學！仲自己賺錢交學費唔靠屋企，我以你為榮啊仔！」

「媽，到底妳想講乜啊…」

「你睇～我乜都知道曬喇～」

阿媽畀佢部手機我睇，原來係大榴槤單新聞，佢完全無睇到內容，淨係睇到「大學生」三個字…

「阿媽，其實件事唔係妳諗咁…」

「仔！唔洗講！只要你唔係殺人放火，啲錢點嚟我係唔會過問。」

「妳聽我講先，妳根本唔明…」

「我明！你咁廢！邊搵到咁多錢吖，性工作者都值得受尊重㗎！」

「……」阿媽呢種生物，就係無辦法溝通，就畀佢老人家開心嚇。

隔咗一陣老豆就打嚟。

「叻仔啊！有骨氣！向強權說不！等佢成日加價吖喇，喂可唔可以透露少少，下次諗住點打殘港鐵呢？」

「單新聞唔係我嚟…」

「咩話，個樣咁似你嘅！？」

「幅相係我，但係…」

「咁咪得囉！呢個年代邊有人睇字㗎。我已經叫曬全公司開心share㗎啦。」

就係咁，呢件事我身邊嘅親朋戚友、老豆嘅同事都知道呢件事。

不過，我低估咗網絡嘅力量。

第日，我返工搭巴士，都未拎張八達通出嚟，個司機已經大叫：「下車！」

「嚇？」我心諗唔係嘛，連巴士司機都有睇單嘢？

「全部人下車，架車死火啊，我會安排另一架巴士 載你哋！」巴士司機。

當我正想掉頭行返下車，司機就細細聲同我講「你唔洗啦，我係叫佢哋全部人下車，我會載你去目的地，中途唔停站㗎！你想去邊？」

「但係…」

「唔好但係喇，呢度有早餐，我老婆整嘅，嗱你坐喺度慢慢食，唔好投訴我啊。」

一個月後。

呢段日子我唔單止日日免費搭巴士，就連行過街市，生果佬都會送個榴槤畀我食。我仲做埋城巴代言人添。

「城巴服務唔反智，仲會請你食魚翅，大家一齊嚟試試～」

呢句就係我代言嘅口號。

呢單新聞仲衝出國際添，就前兩日，仲收到空運送嚟嘅急凍山貓王。

「邊個寄嚟㗎呢？喂阿媽你食唔食急凍榴槤啊？」

我有冇向公眾講出真相？

喂大佬啊！我又無做錯事，炒一個司機啫，而家巴士服務又好轉，又唔加價，市民受惠，我只不過係收多少少惠咋嘛，唔洗解釋咁多啦，我都犧牲色相㗎大佬！

不過，今日我收到一個電話，係醫院打嚟…

佢話阿媽食物中毒，情況嚴重，而家急救緊。

我即刻趕去醫院問醫生到底發生咩事。

「你媽媽佢食咗有劇毒嘅榴槤，本身我哋諗住幫佢洗胃，但係途路上出現突發狀況，所以延遲咗急救…」

「突發狀況？咩事？」

呢個時候，有個警察走埋嚟。

「救護車去到隧道中間，有架巴士打橫塞住成條路，搞到大塞車，救護員用人手加直昇機先將傷者送到嚟醫院！」

「巴士？點會咁㗎？」

「我哋到場捉住個兇手，查過佢身份，佢就係之前因為你而被炒嘅司機個仔。佢都認咗箱有毒榴槤係佢送嚟！」

「點、點會咁…」

「佢爸爸被炒之後，因為受唔住壓力而自殺，所以佢就一直搵機會報仇。」

「但單新聞都唔關我事，我只係畀人拎咗張相貼上去咋！」

「嚇？唔關你事？單新聞都成個月，點解你當時唔解釋清楚？」警察畀返阿媽部手機我。

「我…」阿媽部手機嘅Wallpaper，就係單新聞。

我明明有好多機會解釋…

第一次搭免費巴士時我可以解釋，

去街市收到榴槤可以，

做城巴代言人時亦可以…

而我就因為貪小便宜，令阿媽受害。

我真係好後悔，如果可以時光倒流，畀次機會我重新嚟過。

我一定鬧爆大榴槤個仆街網…

我望住部手機，眼前景物因為眼淚而扭曲，眼淚一滴一滴咁流落嚟。

當我抹走啲眼淚，抬起頭先發現…我時光倒流返咗去一個月前。

亦即係畀人拎相嘅今日！

我決定要寫個故！鬧爆大榴槤你個仆街網！

轉載請註明來源：今天頭條