TVB經常俾人批評小生花旦人口老化問題嚴重，台灣、日本、南韓等地電視台通常都會起用青春偶像歌手拍劇做主角，年紀介乎十幾歲至三十幾歲。例如南韓人氣劇集《雲畫的月光》，女主角金裕貞只有17歲，而男主角朴寶劍亦只有23歲，但劇集一樣收得。相反，要做大台劇集主角無三字頭幾乎無可能上位，例如備受力捧嘅黃翠如同胡定欣都已經35歲；四字頭嘅女一都唔少，例如有宣萱（46歲）、蔡少芬（43歲）、佘詩曼（41歲）等。雖然大台近年力捧二字頭嘅蔡思貝（25歲）同陳凱琳（25歲），可惜負評不斷，大台睇嚟真係要諗諗計培訓下啲新人後輩接棒啦！

香港討論區網民Stophy將2017年所有有份開戲嘅小花分幫派製成圖表，例如「有線幫」、「港姐幫」等。發現四字頭的女星有11人；三字頭有24人；二字頭有20人。換言之，三字頭嘅女星比率最高，同時做女一嘅人數亦都最多，可見大台偏好成熟但又唔會太老嘅女演員。

縱觀多位小花來年嘅劇集拍攝列表，以「有線幫」嘅李佳芯同上位神速嘅蔡思貝為全台花旦之冠，兩個都有4套劇集開拍。孭3套劇嘅小花都唔少，不過以田蕊妮同黃智雯最巴閉，3套都擔正女一，唔知到時觀眾頂唔頂得順啦？其次就係回巢嘅傅嘉莉，孭1套女一2套女二，成功擊敗翠如bb。

不過由於部分劇集未落實演員嘅角色分配，有關列表未算最準最齊，僅作參考之用。不少網民都有讚樓主超有心機整圖，有人就認為大台浪費演員青春「一個女人最靚係 18-22」，但係大部分女一都係三十幾歲。不過都有網民撐大台，覺得年齡唔係問題，演技先最重要。

圖一（圖片：Stophy）

轉載請註明來源：今天頭條