今年57歲嘅「TVB廚神」李錦聯，喺大台服務咗25年，係師奶節目《都市閒情》嘅台柱，佢主持嘅「今晚食乜餸」環節，吸引唔少師奶日日坐定定追看。

之前李錦聯、安德尊拍住香香岑麗香拍節目《區區有伙》，原本嗌交做綽頭，但由於大台勁多掣肘，搞到唔湯唔水，李錦聯亦做到勁無癮。

李錦聯話原本喺節目自度咗好多對白，但因為驚踩界，最後都俾監製cut咗！

不過，收到消息，李錦聯做埋今個月，就會離開無綫，以後喺《都市閒情》，想聽到李錦聯講金句「靠得住」，或者想睇佢同安德尊呢對加埋過百歲嘅活寶，喺節目中「隔劍」，示範「無敵鴛鴦鏟」場面，將成絕響！)

李錦聯早年試過剝衫揸鑊鏟做訪問！

仲同當年緋聞女友余少寶一齊做訪問！

對於劈炮唔撈，日前打俾李錦聯，佢大方承認做埋今個月底，就會離開大台。李錦聯話：「始終自己年紀有番咁上下，諗住想休息嚇享受嚇人生，其實兩個月前有試過同監製講，話原本一個禮拜做兩日《都市閒情》，可唔可以減到變一日，但監製話做一日太少，咁我就話不如停一停啦！」

李錦聯除咗做《都市閒情》，不時會出席飲食活動！

一間公司做咗20幾年，或多或少都會有份感情，李錦聯對無綫固然有份唔捨得之情。但做到意興闌珊亦係離開大台嘅原因之一。

李錦聯話：「之前同大王(安德尊)拍《區區有伙》，原意係想我同佢喺節目你窒嚇我、我寸嚇你，啲觀眾最想睇呢啲啫，咁我同大王都有啲火花嘛，講嘢有時踩嚇界、玩嚇諧音，例如大王飲嘢，我就順口問句：『你仲乜『飲』嘢？』其實我冇講粗口㗎！不過監製話唔批，可能佢哋覺得個節目放喺合家歡時間啦，佢哋驚俾人投訴，所以咪cut走呢啲對白囉，咁你知啦，寫稿嗰班後生仔唔敢揹飛嘛，會寫啲唔會瀨嘢嘅對白，搞搞嚇，我都冇乜心機做，佢哋話講乜就講乜啦！」

離開大台，李錦聯話「可惜一定有」，但自己亦唔想固定咗個框框，成世做煮餸佬。「我諗出面10個人有9個半都知我教煮餸，但其實我出面都有好多嘢做，幫好多餐廳、廚具做代言搞推廣，再唔係休息一排，會有一個新形式，試嚇自己喺網上做條飲食channel都未定呢！」

李錦聯（Ben Li Kam Luen，1960年6月4日－），香港電視烹飪節目主持，有「TVB廚神」之稱。

李錦聯中學就讀皇仁書院，畢業於香港大學[1]。早年在理工學院任教，其後獲得TVB賞識而在婦女節目中主持煮食節目。1994年曾開設食品公司，以自創「李錦雞」主攻婦女市場。1996年因拍三級片《狂野三千響》而被無線雪藏[2]，後來獲解凍並在《都市閒情》主持《今晚食乜餸》，但他在主持節目期間曾被指多次爆粗而要令直播節目突然中斷其環節。

2011年，他曾被指打女友，期間更有人將手提電腦掟落街[3]。

李錦聯為《都市閒情》主持環節《今晚食乜餸》已多年，受到不少師奶觀眾歡迎。不過他與另一主持人安德尊自2009年起卻曾屢次在節目中明爭暗鬥，事件更多次被報章報導[4]。他們自2011年起未有再同台主持節目，直至2015年2月再度同台，期間多次擦出火花。兩人於2015年4月再度合作做節目[5]，再次火花四濺。不過，2013年李錦聯與拍拖年多的女友Winnie結婚時卻請安德尊擔任司儀[6]。現時，李錦聯除了在《都市閒情》節目中教授烹飪技巧之餘，亦在紅磡民裕街經營自家食店「錦聯食坊」、擔任香港考試及評核局酒店餐飲服務科的首席評考主任，以及經常獲邀擔任烹飪比賽的評判。2016年，無線電視推出節目「區區開伙」，由李錦聯和安德尊主持，介紹香港各區的美食。當中兩人互相單打的對白非常生鬼。

2016年，他與安德尊一同獲提名《TVB 馬來西亞星光薈萃頒獎典禮2016》「最喜愛TVB節目主持」。

轉載請註明來源：今天頭條