話說上星期六，有個男網友約我睇戲，我哋平時喺網上溝通都好啱嘴型，但見嘅話真係第一次！我哋心知大家對對方都有好感，所以我都花咗好多時間搵戰衣去見佢，咁佢都唔係隨便著一件波衫見我，著咗件窩釘皮褸，下身襯牛仔褲 ，總之好似G dargon 咁型！

入到場，大概半個鐘之後，佢開始郁，我意思係佢注意力開始轉向我。因為我feel 到佢不時望住我呢邊，咁我亦都借啲依挨近佢，我隻手放咗喺大脾，因為我哋坐嘅位係無手柄，佢要拖我其實好易。

當我挨近佢，放咗對手喺自己大脾，大概三分鐘，佢隻手就無啦啦捉住我隻手，然後問我凍唔凍。我話凍，佢就雙手捉住我對手問我，咁樣有無好啲？我只係耷低頭傻笑，無答到佢，亦無拎開佢隻手。我以為我哋會一真拖住對方對手，去到套戲完。點知，佢拖咗唔夠兩分鐘就縮番隻手放喺自己大脾。我嗰陣幾想捉番佢隻手過嚟！！但因為女仔受矜持呢個詞語嘅約束，所以我無咁做！

睇完戲，仲竟然無下文！唔係我叫佢食埋嘢先走，佢真係走咗！去到餐廳，佢坐喺我對面。等緊嘢食嘅時候，佢唔知點解成日望住我放喺檯面嘅一對手！我唔好意思俾佢係咁望，所以我放番對手喺大脾，再問佢做咩，佢又話無嘢，全程都講唔夠十五分鐘，總之氣氛好靜局！

之後，我呢幾日都不斷檢討自己點解咁失敗，竟然被人約完之後，成個差唔多成個星期都無下文。終於，我今日諗到個結論。

一，係佢怕羞，另外一個結論係，佢嫌棄我對手。怕羞，似乎唔係一個合理嘅解釋。因為我有睇佢IG，佢成日都會同一班男女影啲飲飽食醉嘅相，所以無理會掂嚇女仔對手都咁怕羞。唯一一個解釋，而我又唔想承認嘅原因係，我對手唔夠滑！我平時有搽Hand Cream係嗰日掛住搵衫同佢睇戲無搽到，雖然真係好揩因為我喺餐廳做PT，成日會掂到水。。。但咁少嘅事，佢唔係咁都介懷啩。。。！ 我真係唔知係咩事!

轉載請註明來源：今天頭條