1、禾稈珍珠的私家籌

大家首先回想一下，中學時代，除咗一啲校花級數嘅風頭躉之外，總會有一兩個禾稈冚珍珠，異常低調到唔多起眼嘅女同學，你會暗暗偷望佢。因為365日連夏天都唔會除嘅果件冷背心之下，明明有一副PE堂掩蓋唔住嘅好身材；一款普通到暈嘅眼鏡後面，有一張永冇話整色整水嘅精緻臉孔。

呢類女仔，俾到人一種感覺，唔止可以遠觀，仲可以係其他男同學唔多發覺情況底下，靜雞雞走過去獻殷勤繼而私有化，攞住支私家籌刀仔鋸大樹。溝到正妹之餘，仲唔怕咁易俾人撓牆腳添。

阿雪正正就比到呢一種感覺大家，入行10年，係主流媒體名不經傳。彷彿如此一件尤物，冇人睇到留意到，但阿雪卻在燈火欄柵處。與女神嘅距離感即時大減，換來嘅係鄰家女孩feel。

2、老來先露

女神來講，面對網絡haters最常見嘅攻擊源頭係咩呀？女網民囉！換轉阿雪10年前初出道開始如果已經行性 感，效果一定好唔同！會換來「賣弄」、「搏咩?」嘅惡名。只要一旦被歸類為造作發姣，發酵落去，可以做咩都俾人鬧。但話說，阿雪今年已經34歲（係！係完全睇唔出）年輕時低潮時唔行性 感，已經攞盡「唔係博啲咩」嘅光環。加上去到呢個歲數，先至偶然作性 感演出，今次適逢入行10周年，先至以「留倩影」做理由，第一次推出寫真集。女性觀眾直情係I know your feeling bro.jpg啦。斷定阿雪嘅性 感，唔係「青春少女嘅威脅」，而係大家作為女人共同面對韶華漸去嘅相憐，「留倩影，我明喎，我又何嘗唔係咁諗」。所以女網民就算唔特別撐，起碼都唔會踩多腳。

3、有口德

藝人面對大眾又或者傳媒，講說話有兩種技巧：第一種，係唔好講錯野；第二種，係特登講錯野。講錯野即係講嘅嘢有爆點，吸引到眼球。所以好多藝人為咗曝光率，都鍾意特登講錯野。但你見阿雪一向都唔會講啲嘩眾取寵嘅嘢搏曝光，真心講嘅嘢，得體之餘亦恰到好處，唔會引發關公災難。咁嘅表現，唔會引來大眾haters，唔會成為同行犯眾憎。男網民睇在眼裡， 同自己素來最怕嘅「八婆」完全相反，你話點樣死唔引死人丫？

4、唔係整容樣

相信坊間整容醫生A-Z嘅樣板當中，冇阿雪呢個樣嘅套餐。所以阿雪個樣，好少話同人撞樣……除咗波多野之外。當一眾網民每日睇住海量嘅J圖，有一位阿雪個樣咁唔同嘅睇下，都咪話唔醒神。當然啦，佢嘅非整容樣，都係冇haters嘅原因之一啦。

轉載請註明來源：今天頭條